Կրինլանտի վարչապետ Ենս Ֆրետերիք Նիլսըն յայտարարեց, թէ Քոփենհակընի, Նուքի եւ Ուաշինկթընի միջեւ դանիական ինքնավար մարզին շուրջ բանակցութիւնները յառաջընթաց կ՛արձանագրեն, սակայն տակաւին համաձայնութիւն չէ գոյացած:
Կրինլանտի վարչապետը Քոփենհակընի ժողովրդավարութեան վեհաժողովի ընթացքին իր արտասանած խօսքին մէջ ըսաւ. «Մենք կը բանակցինք, սակայն համաձայնութեան չհասանք»:
Ան վեհաժողովէն ետք ալ մամլոյ ասուլիսի ընթացքին նշեց, որ Կրինլանտը Միացեալ Նահանգներուն հետ ունի պաշտպանական համաձայնութիւն մը, որ վերջիններուս իրողապէս կ՛արտօնէ յաւելեալ ռազմակայաններ ստեղծել, եթէ այդ մէկը փափաքին:
«Չեմ կրնար բանակցութիւններուն վերաբերեալ որոշակի մանրամասնութիւններ յայտնել, սակայն պատրաստ ենք աւելին ընելու եւ աւելի մեծ պատասխանատուութիւն ստանձնելու», ըսաւ Նիլսըն` աւելցնելով. «Մեր միակ պահանջը յարգանքն է»: