Ռէալ Մատրիտի նախագահ Ֆլորենթինօ Փերես անակնկալ մամլոյ ասուլիս մը տուաւ երեքշաբթի գիշեր, ուր բաւական խիստ արտայայտութիւններ ունեցաւ Ռէալ Մատրիտ ակումբի դէմ վերջին «արշաւ»-ին գծով:
«Պիտի չհրաժարիմ եւ կ՛ուզեմ նոր ընտրութիւններ կատարել: Ես 26 տարիներէ ի վեր հոս եմ, եւ ասիկա շատ լաւ ժամանակ մըն էր ակումբին համար: Կ՛ուզեմ վերջ դնել Ռէալ Մատրիտի դէմ արշաւին: Ով որ պատրաստ է իմ դէմս պայքար մղելու, պէտք է պարզապէս բացայայտէ, թէ ինչ պիտի ընէ եւ ինչպէ՛ս նիւթական ձեւով պիտի աջակցի: Կ՛ուզեն ցոյց տալ, թէ Ռէալ Մատրիտ ակումբը հարցեր ստեղծողն է, բայց Ռէալ Մատրիտը աշխարհի ամէնէն մեծ ակումբն է: Ես միայն 7 անգամ շահեցայ «Չեմփիընզ լիկ»-ը եւ 7 անգամ «Լա լիկա»-ն, երբ կրնայի 14 անգամ շահիլ, որովհետեւ մնացեալները մեզմէ «գողցուեցան»»:
Ան կը մատնանշէր Պարսելոնան, որ իբրեւ թէ կաշառած էր իրաւարարներու կոմիտէի նախկին նախագահ Խոսէ Մարիա Էնրիքես Նեկրէյրան` վճարելով 7 միլիոն եւրօ քանի տարիներու ընթացքին:
Ան յայտնեց նաեւ, որ ինք եւ իր գործակիցները 500 էջնոց գրքոյկ մը պատրաստած են եւ պիտի ղրկեն «Եու. Է. Էֆ. Ա.»-ին` փաստելով սպանացի իրաւարարներուն փտածութիւնը: