Ուկրաինան հայտարարել է, որ Ռուսաստանը խախտել է հայտարարված եռօրյա հրադադարը՝ հարվածներ հասցնելով երկրի մի շարք շրջանների, այդ թվում՝ Խարկովին։
Խարկովի մարզային ռազմական վարչակազմի ղեկավար Օլեգ Սինեգուբովի հաղորդմամբ՝ մայիսի 9-ի երեկոյան ռուսական ուժերը անօդաչու թռչող սարքերով հարվածել են քաղաքի Ինդուստրիալ շրջանում։ Դրանցից մեկը վնասել է ինը հարկանի բնակելի շենքի տեխնիկական հարկը։ Արդյունքում տուժել է հինգ մարդ, որոնցից առնվազն երեքի մոտ արձանագրվել է սուր սթրեսային ռեակցիա։
Հարվածների մասին հայտնել են նաև Դնեպրոպետրովսկի մարզից։ Մարզպետ Ալեքսանդր Գանժայի խոսքով՝ ԱԹՍ-ներով հարձակման են ենթարկվել երկու շրջաններ։ Սինելնիկովսկի շրջանում տուժել է երեք տարեկան աղջիկ, որը հոսպիտալացվել է՝ միջին ծանրության վիճակում։
Միևնույն ժամանակ, Ուկրաինայի ԶՈւ օդային ուժերը հայտարարում են, որ մայիսի 10-ի կեսգիշերից հետո արձանագրված 27 անօդաչու թռչող սարքերից բոլորը խոցվել են, և հարվածներ չեն գրանցվել։ Խարկովի դեպքը, ըստ ամենայնի, այդ հաշվետվության մեջ ներառված չէ։
Հիշեցնենք, որ մայիսի 9-11-ը հայտարարված եռօրյա հրադադարը նախաձեռնել էր ԱՄՆ նախագահ Դոնալդ Թրամփը։ Նրա խոսքով՝ առաջարկը ընդունվել էր թե՛ Ուկրաինայի, թե՛ Ռուսաստանի կողմից։ Սակայն կողմերը շարունակում են փոխադարձ մեղադրանքներ հնչեցնել հրադադարի խախտումների վերաբերյալ։