Իրանում առնվազն 149,000 քաղաքացիական կառույցներ, այդ թվում՝ դպրոցներ, բժշկական կենտրոններ և բնակելի շենքեր, վնասվել կամ ավերվել են ԱՄՆ-ի և Իսրայելի հարվածներից։ Այս մասին հայտարարել է Իրանի Կարմիր մահիկի ընկերության գլխավոր քարտուղար Մեյսամ Աֆշարը։
«Պատերազմի ընթացքում ընդհանուր առմամբ հարված է հասցվել 149,528 քաղաքացիական կառույցների։ Թշնամու կողմից հարձակման է ենթարկվել առնվազն 123,000 բնակելի շենք և 24,450 առևտրային շենք», – ասել է նա մամուլի ասուլիսի ժամանակ։ Աֆշարի տվյալներով՝ հակամարտության ընթացքում վնասվել է 993 դպրոց և նախադպրոցական հաստատություն, 32 համալսարան, 350 բժշկական կենտրոն և շտապ օգնության կենտրոն, ինչպես նաև 15 օդանավակայան։
Իրանի Կարմիր մահիկի ընկերության գլխավոր քարտուղարը հավելել է, որ ԱՄՆ-ի և Իսրայելի հետ հակամարտության ընթացքում Իսլամական Հանրապետությունը մարդասիրական օգնություն է ստացել առնվազն 18 երկրներից, ինչը ապահովել է, որ երկրում պակաս չլինի։