Ճապոնական Nikkei բիզնես թերթը հաղորդում է, որ Ճապոնիայի իշխանությունները Թեհրանին չեն վճարել «Իդեմիցու Մարու» լցանավի Հորմուզի նեղուցով անցնելու համար։
Ճապոնական կառավարությունում թերթի աղբյուրների փոխանցմամբ՝ նավի անցումը հնարավոր է դարձել իշխանությունների և իրանական կողմի միջև բանակցությունների շնորհիվ։ «Սա Ճապոնիայի կառավարության կողմից վարված բանակցությունների արդյունքն է։ Մենք որևէ վճար չենք արել լցանավի անցման համար», – թերթը մեջբերում է կառավարության բարձրաստիճան պաշտոնյայի խոսքերը։
Ավելի վաղ «Թասնիմ» լրատվական գործակալությունը հաղորդել էր, որ ճապոնական «Իդեմիցու Մարու» լցանավը Հորմուզի նեղուցով անցել է Իրանի օգնությամբ։ Լրատվական գործակալության տվյալներով՝ ճապոնական «Իդեմիցու Կոսան» նավթավերամշակման գործարանին պատկանող և 2 միլիոն բարել նավթ տեղափոխող նավը փետրվարի վերջից գտնվում էր Սաուդյան Արաբիայի ափերի մոտ։ Ճապոնական ընկերությունը հրաժարվել է մեկնաբանություն տալ այս հարցի վերաբերյալ՝ վկայակոչելով անվտանգության հետ կապված մտահոգությունները։