Վլադիմիր Պուտինը Սանկտ Պետերբուրգում Իրանի արտաքին գործերի նախարար Աբբաս Արաղչիի հետ հանդիպման ժամանակ հայտարարել է, որ ստացել է գերագույն առաջնորդ Մոջթաբա Խամենեիի ուղերձը։
Պուտինը չի բացահայտել ուղերձի բովանդակությունը։ Նա խնդրել է Արաղչիին փոխանցել Խամենեիին առողջություն ու բարեկեցություն։
«Մենք անկեղծորեն հույս ունենք, որ քաջության և անկախության ցանկության վրա հիմնվելով՝ Իրանի ժողովուրդը կհաղթահարի փորձությունների այս դժվարին շրջանը նոր առաջնորդի ղեկավարությամբ, և խաղաղությունը կգա», – ընդգծել է նա։
Նախագահն ասել է նաև, որ Ռուսաստանը մտադիր է օգնել Իրանին Մերձավոր Արևելքին խաղաղություն բերելու հարցում։
Արաղչին շնորհակալություն է հայտնել Մոսկվային աջակցության համար։ Նա բարձր է գնահատել երկու երկրների միջև հարաբերությունները և նշել, որ դրանք կամրապնդվեն։ Դիվանագետն ասել է, որ Իրանը կշարունակի պայքարել Միացյալ Նահանգների դեմ։
«Ամբողջ աշխարհին ապացուցվեց, որ իրանցի ժողովուրդը, իր դիմադրության և քաջության շնորհիվ, կարողացավ դիմակայել ամերիկյան հարձակումներին և ամերիկյան ագրեսիային», – նշել է նա։
Բանակցություններից առաջ նախարարը հայտարարել է, որ նախատեսում է Ռուսաստանի հետ քննարկել Մերձավոր Արևելքում հակամարտությանը վերջ դնելու ջանքերի համակարգումը։
Հանդիպումը տևել է գրեթե երկու ժամ, որին մասնակցել են նաև արտգործնախարար Սերգեյ Լավրովը, նախագահի օգնական Յուրի Ուշակովը և զինված ուժերի գլխավոր շտաբի գլխավոր վարչության պետ Իգոր Կոստյուկովը: Իրանի պատվիրակության կազմում, բացի Արաղչիից, եղել են նրա տեղակալ Քազեմ Ղարիբ-Աբադին և Մոսկվայում դեսպան Քազեմ Ջալալին: