Իրանի արտաքին գործերի նախարար Աբբաս Արաղչին հայտարարել է, որ Ռուսաստան կատարելիք իր այցի ընթացքում կքննարկի ԱՄՆ-ի և Իսրայելի հետ հակամարտության շուրջ զարգացումները։
Նա նշել է, որ Իրանը և Ռուսաստանը միշտ սերտ խորհրդակցություններ են վարել բոլոր հարցերի շուրջ, այդ թվում՝ տարածաշրջանային։
«Այնուամենայնիվ, պարտադրված պատերազմի պատճառով մենք ընդմիջում ենք ունեցել հանդիպումներում։ Մենք կօգտագործենք այս հնարավորությունը քննարկելու պատերազմի հետ կապված զարգացումները։ Բնականաբար, պետք է իրականացվի նաև անհրաժեշտ համակարգում», – ասել է նախարարը։
Արաղչին երկուշաբթի ժամանել է Սանկտ Պետերբուրգ, որտեղ, ըստ Իրանի արտաքին գործերի նախարարության, բանակցություններ կվարի իր ռուս գործընկեր Սերգեյ Լավրովի հետ։ Ըստ Մոսկվայում Իրանի դեսպան Քազեմ Ջալալիի, իրանցի նախարարը նաև ակնկալում է հանդիպել Ռուսաստանի նախագահ Վլադիմիր Պուտինի հետ։