Վրաստանի արտաքին գործերի նախարար Մակա Բոչորիշվիլին նշանակվել է կառավարության փոխվարչապետ՝ պահպանելով իր նախարարական պորտֆելը: Այս մասին ճեպազրույցի ժամանակ հայտարարել է վարչապետ Իրակլի Կոբախիձեն:
«Ցանկանում եմ տեղեկացնել ձեզ, որ Վրաստանի արտաքին գործերի նախարար տիկին Մակա Բոչորիշվիլին կստանձնի փոխվարչապետի պարտականությունները: Համապատասխանաբար, կառավարությունը կունենա երեք փոխվարչապետ», – ասել է Կոբախիձեն՝ ընդգծելով, որ Բոչորիշվիլին կշարունակի պաշտոնավարել որպես արտաքին գործերի նախարար:
Կոբախիձեն հայտարարել է, որ փոխվարչապետի պաշտոնը առաջարկել է նաև Վրաստանի պետական անվտանգության ծառայության ղեկավարի պաշտոնից հրաժարական տված Մամուկա Մդինարաձեին: Նա նաև կզբաղեցնի Վրաստանի իրավապահ մարմինների համակարգման պետական նախարարի նոր պաշտոնը:
Պետական նախարարի նոր պաշտոնը կձևավորվի միայն խորհրդարանի հաստատումից հետո:
Մինչև ապրիլի 21-ը Վրաստանի կառավարությունն ուներ մեկ փոխվարչապետ՝ պաշտպանության նախարար Իրակլի Չիկովանին: