Փարիզում իրավապահ մարմինները բացահայտել և վնասազերծել են հանցավոր խմբավորում, որը զբաղվել է ՊՍԺ-ի հանդիպումների տոմսերի կեղծմամբ։
Ինչպես հաղորդում է Le Parisien պարբերականը, խարդախության հետևանքով տուժել է մոտ 2000 երկրպագու, իսկ ընդհանուր վնասը կազմել է շուրջ 40 հազար եվրո։ Մարտի սկզբին Փարիզի կիբերոստիկանությունը ավարտել է հետաքննությունը, որի արդյունքում բացահայտվել է շուրջ երկու տարի գործած խարդախության սխեման։
Գործով գլխավոր կասկածյալը 22-ամյա երիտասարդ է, ով սոցիալական ցանցերում ստեղծել է կեղծ տոմսերի վաճառքի համակարգ՝ առաջարկելով տոմսեր ինչպես ՊՍԺ-ի՝ «Պարկ դե Պրենս» մարզադաշտում կայանալիք տնային, այնպես էլ արտագնա խաղերի համար։ Երկու տարվա ընթացքում նրա էջը հավաքել է ավելի քան 13 հազար հետևորդ, որոնք վստահել են վաճառողին։
Հանցավոր գործունեությունը հնարավոր է եղել կասեցնել միայն այն բանից հետո, երբ հունվարի 28-ին ՊՍԺ-ի ղեկավարությունը պաշտոնական դիմում է ներկայացրել ոստիկանություն։
Հարցաքննության ժամանակ գլխավոր կասկածյալն ընդունել է իր մեղքը։ Նրան մեղադրանք է առաջադրվել խարդախության, կեղծ փաստաթղթերի օգտագործման և փողերի լվացման համար։