Ֆրանսիացի իմպրեսիոնիստ նկարիչ Կլոդ Մոնեի նկարը Ֆրանսիայում աճուրդում վաճառվել է 10.2 միլիոն եվրոյով։ Այս մասին վկայում են Sotheby’s աճուրդի տան տվյալները:
Խոսքը «Vétheuil, effet du matin» նկարի մասին է, որը նկարիչը նկարել է 1901 թվականին։ Մոնեի մեկ այլ նկար՝ «Les Iles de Port-Villez» (1883), նույն աճուրդում վաճառվել է 6.45 միլիոն եվրոյով։ Ինչպես նշել է Agence France-Presse-ը՝ հղում անելով աճուրդի տանը, սրանք «Ֆրանսիայում աճուրդում վաճառված Մոնեի աշխատանքների ռեկորդային ցուցանիշներ են»։
Երկու նկարներն էլ անցյալ դարի ընթացքում գտնվել են մասնավոր հավաքածուներում։ «Vétheuil, effet du matin» նկարը գնահատվել է 6-8 միլիոն եվրո, իսկ «Les Iles de Port-Villez»՝ 3-5 միլիոն եվրո։ 20 տարվա տարբերությամբ նկարված նկարները պատկերում են Սեն գետը Ժիվեռնիի մոտակայքում գտնվող տարածքում, որը Փարիզից հյուսիս-արևմուտք գտնվող գյուղ է, որտեղ ապրել է Մոնեն։