Իրանի արտաքին գործերի նախարարության խոսնակ Իսմայիլ Բաղային հայտարարել է, որ պատերազմի դադարեցման շուրջ բանակցությունների անցկացումն ուղղակիորեն կապված է բոլոր ճակատներում, և հատկապես Լիբանանում, հրադադար հաստատելու վերաբերյալ ԱՄՆ-ի ստանձնած պարտավորությունների կատարման հետ։ Բաղային խստորեն դատապարտել է Իսրայելի գործողությունները Լիբանանում՝ շեշտելով, որ կայունության հասնելու ցանկացած փորձ պետք է լինի համապարփակ։
Ըստ Իրանի ԱԳՆ ներկայացուցչի՝ Լիբանանում պատերազմի դադարեցումը Պակիստանի կողմից առաջ քաշված հրադադարի համաձայնագրի անբաժանելի մասն է։ Նա հիշեցրել է, որ Պակիստանի վարչապետը բացահայտ հայտարարել է ԱՄՆ-ի հանձնառության մասին՝ կանգնեցնելու պատերազմը բոլոր ուղղություններով։ Թեհրանը զգուշացրել է, որ այս պարտավորությունից շեղվող ցանկացած քայլ կամ դիրքորոշում կդիտարկվի որպես Վաշինգտոնի կողմից սեփական խոստումների դրժում։
Անդրադառնալով սպասվող բանակցությունների ժամկետներին և վայրին՝ Բաղային հաստատել է, որ Պակիստանի կառավարությունը կողմերին հրավիրել է Իսլամաբադ։ Թեև հանդիպման կազմակերպչական հարցերն այժմ քննարկման և պլանավորման փուլում են, իրանական կողմը շեշտում է՝ որևէ բանակցություն հնարավոր է միայն այն դեպքում, եթե ստացվեն հստակ երաշխիքներ, որ Միացյալ Նահանգները կապահովի հրադադարի ռեժիմի պահպանումը բոլոր ռազմաճակատներում։