Եվրոպական դիվանագիտության ղեկավար Կայա Կալլասը հայտարարել է, որ եթե ՆԱՏՕ-ից դուրս գան Միացյալ Նահանգները, ապա ոչ ոք չի կարող լիովին փոխարինել նրանց դերը դաշինքում։ Այս մասին հաղորդում է Րիա նովոստին:
Նա նշել է, որ ՆԱՏՕ-ն կառուցված է դաշնակցային հարաբերությունների վրա, և ամերիկացիների դերը այդ համակարգում առանցքային է։ Ըստ նրա՝ անհրաժեշտ է անել ամեն ինչ, որպեսզի այդ հարաբերությունները պահպանվեն և արդյունավետ գործեն, թեև խնդիրն այն է, որ դրանք միշտ երկկողմ բնույթ ունեն։
Միևնույն ժամանակ, Դոնալդ Թրամփը ապրիլի 1-ին «Telegraph»-ին տված հարցազրույցում ասել է, որ լրջորեն դիտարկում է ԱՄՆ-ի դուրս գալը ՆԱՏՕ-ից՝ այն բանից հետո, երբ դաշինքը չի աջակցել Իրանի դեմ գործողությանը։ Նա ՆԱՏՕ-ն անվանել է «թղթե վագր» և նշել, որ նույնիսկ Ռուսաստանը դա հասկացել է։
Կալլասի խոսքով՝ ստեղծված իրավիճակը ցույց է տալիս, թե որքան կարևոր է պահպանել տրանսատլանտյան համագործակցությունը, քանի որ ԱՄՆ-ի ներգրավվածությունը մնում է ՆԱՏՕ-ի անվտանգության համակարգի հիմքը։