Իրանի և ԱՄՆ-ի միջև հրադադարի շուրջ իրավիճակը մնում է հակասական․ Թեհրանը պաշտոնապես հերքում է բանակցությունների փաստը, մինչդեռ ԱՄՆ նախագահ Դոնալդ Թրամփը պնդում է, որ Իրանի առաջնորդները «չափազանց շատ են ցանկանում գործարք կնքել», սակայն վախենում են դա բացահայտ խոստովանել:
Դոնալդ Թրամփը հայտարարել է, որ Իրանը հուսահատորեն ձգտում է հասնել համաձայնագրի, որը վերջ կդնի գրեթե չորս շաբաթ տևած մարտական գործողություններին՝ հակասելով Իրանի արտաքին գործերի նախարարին, ով ասել է, որ իր երկիրը քննարկում է ԱՄՆ առաջարկը, բայց չունի հակամարտության կարգավորման շուրջ բանակցություններ վարելու մտադրություն։
Իրանի արտաքին գործերի նախարար Աբբաս Արաղչին հայտարարել է, որ ԱՄՆ-ի հետ բանակցություններ չեն ընթանում, սակայն միջնորդների միջոցով տարբեր հաղորդագրություններ են փոխանակվում։
«Բարեկամ երկրների միջոցով հաղորդագրություններ ուղարկելը և մեր դիրքորոշումը հայտնելը կամ անհրաժեշտ նախազգուշացումներ տալը բանակցություններ կամ երկխոսություն չեն», — չորեքշաբթի օրը պետական հեռուստատեսությանը տված հարցազրույցում ասել է Արաղչին։ «Դա պարզապես հաղորդագրությունների փոխանակում է մեր ընկերների միջև»։
Չորեքշաբթի օրը Վաշինգտոնում կայացած միջոցառման ժամանակ ավելի ուշ ելույթ ունենալով՝ Թրամփը նշել է, որ Իրանի առաջնորդները «բանակցում են, և նրանք իսկապես ցանկանում են համաձայնագիր կնքել, բայց վախենում են դրա մասին խոսել։ Թրամփը չի նշել այն անձանց անունները, որոնց հետ ԱՄՆ-ն բանակցություններ է վարում Իրանի հարցով։
Վաշինգտոնը Պակիստանի միջնորդությամբ Իրանին էր փոխանցել 15 կետից բաղկացած հրադադարի պլան: Այն ներառում է միջուկային օբյեկտների ապամոնտաժում, ուրանի պաշարների հանձնում ՄԱԳԱՏԷ-ին, հրթիռային ծրագրի սահմանափակում և Հորմուզի նեղուցի վերաբացում՝ պատժամիջոցների չեղարկման դիմաց:
Միջնորդներն ակտիվորեն փորձում են կազմակերպել կողմերի հանդիպումը, հնարավոր է՝ Իսլամաբադում:
Այս պահին ռազմական գործողությունները շարունակվում են, թեև ԱՄՆ-ն ժամանակավորապես հետաձգել է հարվածները Իրանի էներգետիկ օբյեկտներին՝ դիվանագիտական ջանքերին հնարավորություն տալու համար: