Իրանի արտաքին գործերի նախարար Սեյեդ Աբբաս Արաղչին հեռախոսազրույց է ունեցել իր թուրք գործընկեր Հական Ֆիդանի հետ՝ քննարկելով տարածաշրջանային սրված իրավիճակը և ԱՄՆ-ի ու Իսրայելի գործողությունների հետևանքները։ Արաղչին խստորեն դատապարտել է Իրանի քաղաքացիական ենթակառուցվածքների, այդ թվում՝ դպրոցների ու հիվանդանոցների թիրախավորումը և վերահաստատել Թեհրանի վճռականությունը՝ պաշտպանելու իր ինքնիշխանությունն ու տարածքային ամբողջականությունը։
Նա ընդգծել է, որ տարածաշրջանի երկրներում տեղակայված ամերիկյան և իսրայելական ռազմական օբյեկտներին հարվածելը Իրանի ինքնապաշտպանության բնական իրավունքն է, և ցավ է հայտնել, որ որոշ իսլամական երկրների տարածքներ օգտագործվում են Իրանի դեմ հարձակումների համար։
Անդրադառնալով նավագնացության անվտանգությանը՝ Իրանի գլխավոր դիվանագետը շեշտել է, որ Հորմուզի նեղուցում ստեղծված անկայունությունը «պարտադրված» է և հանդիսանում է ԱՄՆ-ի ու Իսրայելի ռազմական ագրեսիայի անմիջական արդյունքը։
Նրա խոսքով՝ միջազգային հանրությունը պետք է պատասխանատվության ենթարկի այս իրավիճակի իրական հեղինակներին։ Իր հերթին, Թուրքիայի արտգործնախարար Հական Ֆիդանը, ներկայացնելով տարածաշրջանի երկրների հետ իր վերջին խորհրդակցությունները, կարևորել է լարվածության նվազեցմանն ուղղված ջանքերը և Իրանի ու հարևան պետությունների միջև հարաբերությունների ամրապնդման անհրաժեշտությունը։