18 մարտի 2026 – 14:58 AMT
PanARMENIAN.Net – Հայաստանի տնտեսությունը վնասներ է կրում Իրանում պատերազմի հետևանքով, մոտ ժամանակներում կոնֆլիկտն ավարտելու դեպքում վնասները կլինեն հնարավորինս քիչ: Այd մասին Ազգային ժողովի տնտեսական հարցերի մշտական հանձնաժողովի նիստում հայտարարել է ՀՀ էկոնոմիկայի նախարար Գևորգ Պապոյանը՝ անդրադառնալով հնարավոր տնտեսական ռիսկերին։
Նախարարի խոսքով՝ այս օրերին իրականացվում է իրավիճակի գնահատում, հայտնում է Արմենպրեսը:
«Այս օրերին գնահատում ենք այդ ռիսկերը: Հույս ունենք, որ կարճաժամկետ կլինի: Եվ հույս ունենք, որ մեր ռազմավարական գործընկերն ու բարեկամ երկրները, որոնք հիմա հակամարտության մեջ են, կավարտեն իրենց հակամարտությունը: Եվ այդ պարագայում, մեր կարծիքով, վնասները կլինեն հնարավորինս քիչ: Վնասներ ակնհայտորեն հիմա էլ կան, մասնավորապես որոշ ապրանքների գների բարձրացման տեսքով: Նախ գնաճային որոշակի ռիսկեր ենք տեսնում: Երկրորդը՝ որոշ արտադրությունների կազմակերպման համար Հայաստանը նաև հումք է ստանում, որի դեպքում տեսնում ենք, որ նորից գնաճային այդպիսի ռիսկեր է հնարավոր է, որ առաջանան»,- ասել է Պապոյանը։
Նա նշել է, որ Հայաստանը Իրանի հետ ունի զգալի առևտրաշրջանառություն՝ ինչպես ներմուծման, այնպես էլ արտահանման ուղղություններով, և ստեղծված իրավիճակը երկարաժամկետ առումով դրական ազդեցություն ունենալ չի կարող։
«Բայց, եթե հետևում ենք քաղաքական գործիչների՝ բարձր մակարդակով հայտարարություններին, կարծես թե հույս կա, որ մոտակա ժամանակներում կոնֆլիկտը կավարտվի: Եվ կարծում ենք, որ այդ պարագայում շատ մեծ բացասական սպասումներ չպետք է, որ ունենանք»,- ընդգծել է նա։
Փետրվարի 28-ին Իսրայելն ու ԱՄՆ-ն օդային հարվածներ են հասցրել Իրանին, հարվածների հետևանքով սպանվել է Իրանի գերագույն հոգևոր առաջնորդ այաթոլլա Ալի Խամենեին: Իրանը պատասխան կրակ է բացել Իսրայելի, ինչպես նաև Պարսից ծոցի երկրների ուղղությամբ, որտեղ տեղակայված են ԱՄՆ ռազմակայններ: