ԱՄՆ նախագահ Դոնալդ Թրամփը կարծում է, որ Չինաստանի նախագահ Սի Ծինփինի հետ իր հանդիպումը կհետաձգվի մոտ մեկ ամսով։
«Մենք հետածգում ենք հանդիպումը։ Կարծես թե այն տեղի կունենա մոտ հինգ շաբաթից», – Սպիտակ տանը Իռլանդիայի վարչապետ Մայքլ Մարտինի հետ հանդիպման ժամանակ լրագրողներին ասել է ամերիկացի առաջնորդը՝ մեկնաբանելով Չինաստան կատարելիք իր այցի ծրագրերը։ Սպիտակ տան ղեկավարի այցը Չինաստան նախատեսված էր մարտի 31-ից ապրիլի 2-ը։
ԱՄՆ նախագահի տրամադրած տեղեկատվության համաձայն՝ Պեկինը դեմ չէ սկզբնական ծրագրերը փոփոխելուն։ «Մենք աշխատում ենք Չինաստանի հետ։ Ես անհամբեր սպասում եմ նախագահ Սի (Ծինփին)-ի հետ հանդիպմանը։ Կարծում եմ՝ նա անհամբեր սպասում է ինձ հետ հանդիպմանը», – ասել է ամերիկացի առաջնորդը։
Նա նաև ընդգծել է, որ Չինաստանն այժմ «շատ լավ» է վարվում ԱՄՆ-ի հետ տնտեսական ոլորտում։ «Եվ մենք շատ լավ աշխատանքային հարաբերություններ ունենք Չինաստանի հետ։ Այնպես որ, մենք դա կանենք (կազմակերպենք այց Չինաստան – խմբ.) մոտ հինգ կամ վեց շաբաթից», – հավելել է Թրամփը։