Պաղեստինյան ՀԱՄԱՍ զինյալ խմբավորումը Թեհրանին կոչ է արել դադարեցնել հարևան արաբական պետությունների վրա հարձակումները։
«Վերահաստատելով Իրանի Իսլամական Հանրապետության իրավունքը՝ միջազգային նորմերի և օրենքների համաձայն արձագանքելու այս ագրեսիային բոլոր հասանելի միջոցներով, շարժումը կոչ է անում իր եղբայրներին Իրանում խուսափել հարևան երկրների վրա հարձակումներից», — ասվում է ՀԱՄԱՍ-ի հայտարարության մեջ։
ՀԱՄԱՍ-ը, որը երկու տարի պատերազմ էր մղել Իսրայելի հետ Գազայի հատվածում, ռազմական գործողություններն անհապաղ դադարեցնելու կոչով դիմել է նաև միջազգային հանրությանը։
Խումբը ավելի վաղ դատապարտել էր Իրանի գերագույն առաջնորդ Ալի Խամենեիի սպանությունը՝ այն անվանելով «հրեշավոր հանցագործություն»։
«Նա մեր ժողովրդին, մեր գործին և մեր դիմադրությանը տրամադրել է քաղաքական, դիվանագիտական և ռազմական աջակցություն», — հայտարարել է շարժումը Խամենեիի մահից կարճ ժամանակ անց։
Իրանը հայտարարում է, որ իր հարվածների թիրախում Պարսից ծոցի երկրներում գտնվող ամերիկյան ռազմական օբյեկտներն են, այլ ոչ թե իր հարևանները, բայց հարվածներից վնասներ են կրել նաև քաղաքացիական ենթակառուցվածքները։