Պետական սահմանի անցման կետերում տրանսպորտային միջոցների կուտակումներից խուսափելու համար փետրվարի 19-ից փոխվել է բնապահպանական և ճանապարհային հարկերի վճարման կարգը։ Այս մասին Iravaban.net–ը տեղեկանում է ՊԵԿ-ից։
Եվ այսպես․
- եթե ֆիզիկական անձը Հայաստանում չգրանցված ավտոմեքենայով մուտք է գործում Հայաստանի Հանրապետության տարածք, ապա բնապահպանական հարկը պետք է վճարել ոչ թե սահմանին, այլ Հայաստան մուտք գործելուց հետո՝ 15 օրվա ընթացքում։ Իսկ Հայաստանից ավելի շուտ ելքի դեպքում՝ մինչև ելքի պահը։ Ճանապարհային հարկի դեպքում նույնպես կիրառվում է նույն մոտեցումը,
- եթե ֆիզիկական անձը Հայաստան է մուտք գործել Հայաստանում չգրանցված բեռնատար ավտոմեքենայով, տվյալ դեպքում ևս հարկը պետք է վճարել Հայաստան մուտք գործելուց հետո՝ 15 օրվա ընթացքում, իսկ Հայաստանից ավելի շուտ ելքի դեպքում՝ մինչև ելքի պահը։
Թե՛ բնապահպանական, թե՛ ճանապարհային հարկերի դեպքում՝ հարկը մասնակի վճարված լինելու, առհասարակ վճարված չլինելու պարագայում, ինչպես նաև տույժեր հաշվարկված լինելու դեպքում, այդ բոլոր վճարումները պետք է կատարել երկրից դուրս գալու պահին։
Ի դեպ, նոր կարգավորումներով, եթե Հայաստանում չգրանցված բեռնատար ավտոմեքենան ճանապարհի անանցանելիությամբ պայմանավորված չի կարողանում դուրս գալ Հայաստանի Հանրապետության տարածքից, ապա տվյալ ժամանակահատվածի համար ճանապարհային հարկ չի հաշվարկվում։
Ճանապարհային հարկ չեն վճարում նաև այն անձինք, ովքեր Հայաստանում չգրանցված բեռնատար ավտոմեքենայով հատել են Հայաստանի Հանրապետության սահմանը և վերադարձել են՝ Հայաստանի տարածքում գտնվելու ընթացքում չլքելով մաքսային հսկողության գոտին։