ԱՄՆ-ն ներկայումս չի նախատեսում Իրանում ցամաքային զորքեր տեղակայել, սակայն այդ հնարավորությունը լիովին չի բացառվում, մամուլի ասուլիսի ժամանակ հայտարարել է Սպիտակ տան մամուլի քարտուղար Քերոլայն Լևիթը։
Նրա խոսքով՝ «Էպիկական կատաղություն» ռազմական գործողությունը նոր ուղի է հարթել՝ ԱՄՆ-ի և նրա քաղաքացիների անվտանգությունն ավելի արդյունավետ ապահովելու համար։
Լևիթը նշել է, որ գործողության ընթացքում ոչնչացվել են ավելի քան 20 իրանական նավեր, և ԱՄՆ-ի նպատակն է «մշտապես մարել» Իրանի միջուկային նկրտումները, ինչպես նաև ոչնչացնել նրա բալիստիկ հրթիռային կարողությունները։
Մամուլի քարտուղարը նաև հայտնել է, որ Մերձավոր Արևելքից իրականացվող տարհանման գործողությունների շրջանակում արդեն ավելի քան 17,500 ամերիկացի վերադարձել է ԱՄՆ։ Նա կոչ է արել տարածաշրջանում գտնվող ԱՄՆ քաղաքացիներին գրանցվել Պետդեպարտամենտում՝ հայրենիք վերադառնալու համար։ Լևիթը հավելել է, որ ԱՄՆ-ն շարունակելու է գործողությունները, որոնք ուղղված են տարածաշրջանում անվտանգության ապահովմանը և Իրանի ռազմական կարողությունների սահմանափակմանը։