Վերջերս վարչապետ Նիկոլ Փաշինյանը, ճեպազրույցում խոսելով երկաթուղու մասին, ասել էր, թե Ռուսաստանի կողմից երկաթուղու կառավարման առումով ռազմավարական դիրքերի կորուստ ենք ունենում, ընդգծել՝ ՌԴ-ի դեմ ոչինչ չունենք, բայց լավ կլինի, որ երկաթուղու կառավարումը գնի մեր ու ՌԴ-ի հետ բարեկամ որևէ երկիր:
Այսօր այս մասին լրագրողներից մեկը խորհրդարանում հարց ուղղեց ԱԺ նախագահ Ալեն Սիմոնյանին՝ հետաքրքրվելով՝ այդ պատկերացումը միս ու արյուն ստանո՞ւմ է:
«Այո, քննարկում ենք նախ և առաջ ռուսական կողմի հետ, ակնկալում ենք հնարավորիս արագ արձագանքը»,- հայտնեց ԱԺ նախագահը՝ հավելելով՝ դա մեզ համար կենսական նշանակություն ունեցող նախագիծ է, որի հետ կապված չքննարկելու այլընտրանք չունենք:
Ճշտող հարցին՝ արդյոք պաշտոնապես քննարկվո՞ւմ է այդ հարցը, պատասխանեց՝ ինչ ասվել է, բարձրաձայն է ասվել:
«Մենք ակնկալում ենք, որ կան երկրներ, որ պատրաստ են գնել (երկաթուղին – խմբ.), բայց չեմ կարող ասել, որևիցե անուն ես տալ չեմ կարող: Ես ինքս հանդիպում եմ տարբեր երկրների դեսպանների հետ, և բնականաբար, կա հետաքրքրություն, խոսակցություն այդ մասին: Այլ հարց է, թե վերջում ինչ որոշում կլինի», – նշեց նա՝ հրաժարվելով մանրամասներ հայտնել:
Ճշտող հարցին՝ արդյո՞ք կայացված է քաղաքական որոշումը երկաթուղու կառավարումը ռուսական կողմից վերցնելու վերաբերյալ, տվեց բացասական պատասխան:
«Ո՛չ, որովհետև բանակցությունները շարունակվում են: Եթե կա կայացված որոշում, դա նշանակում է՝ բանակցելն անիմաստ է»,- ընդգծեց նա:
Հիշեցնենք՝ Հայաստանյան երկաթուղին ռուսական կառավարման ներքո հայտնվեց 2008-ի նախագահական ընտրությունների նախաշեմին: Այն կոնցեսիոն կառավարման հանձնվեց 30 տարով՝ ևս 20 տարի երկարաձգելու հնարավորությամբ: Չնայած պայմանագրի ավարտին դեռ 12 տարի կա, մեր երկրի ղեկավարը պատրաստակամություն է հայտնել հետ վերցնել այդ հատվածները և պետբյուջեի միջոցներով վերականգնել: