Իրանի նախագահ Մասուդ Փեզեշքիանը հանդես է եկել նոր հայտարարությամբ՝ Իրանի գերագույն առաջնորդ այաթոլա Ալի Խամենեիի սպանությունն անվանելով «բացահայտ պատերազմական գործողություն մուսուլմանների դեմ», տեղեկացնում է Mehr-ը։
«Իրանի նախագահը Իսլամական հեղափոխության առաջնորդի սպանությունը բնութագրել է որպես բացահայտ պատերազմական գործողություն ողջ աշխարհի մուսուլմանների, հատկապես՝ շիա համայնքների դեմ»,- գրում է իրանական լրատվամիջոցը։
Ավելի վաղ Իրանի նախագահը հայտարարել էր, որ այաթոլա Խամենեիի սպանությունն անպատասխան չի մնա։
«Այս մեծ հանցագործությունը երբեք անպատասխան չի մնա և նոր էջ կբացի իսլամական և շիա աշխարհի պատմության մեջ»,– ասված է տելեգրամյան ալիքի հաղորդագրության մեջ։
Փեզեշքիանը հավելել է, որ իսլամական ժողովրդի և աշխարհի ազատ ժողովուրդների աջակցությամբ՝ Խամենեիի սպանությանը մասնակցած մեղավորներն ու հրամանատարները կփոշմանեն իրենց արարքի համար։
Աղբյուր՝ News.am