Ազատագրում եւ բարգաւաճում երեսփոխանական պլոքի անդամ, խորհրդարանի նախագահի քաղաքական խորհրդատու Ալի Հասան Խալիլ նշեց, որ զարմանալի կը նկատէ վարչապետ Նաուաֆ Սալամի ընտրական օրէնքին վերաբերեալ խօսքը, մասնաւորաբար ըսելը, թէ 16-րդ ընտրաշրջանի առկախումը արտերկրի լիբանանցիներուն կ՛արտօնէ 128 երեսփոխաններու քուէարկել:
«Վարչապետի պաշտօնը վարողը, մանաւանդ ան, որ արդարադատական ենթահող ունի, պէտք է աւելի նախանձախնդիր ըլլայ գործող օրէնքներու յարգումին նկատմամբ, եւ ոչ թէ զանոնք քաղաքական մեկնաբանութեան ենթարկէ», նշեց Խալիլ:
«Օրէնքը յայտարարութեամբ չ՛առկախուիր, մեկնաբանութեամբ չի բարեփոխուիր, ոչ ալ անոր վճիռները քաղաքական կամքով կը փոխուին: Իրաւական բովանդակութեան գործօն ըլլալը կը դադրեցուի եւ կը փոխուի միայն սահմանադրական սկզբունքներուն համաձայն հրապարակուող այլ օրէնքի մը ճամբով, եւ ատոր հակասող որեւէ մեկնաբանութիւն կը հակասէ օրինականութեան սկզբունքին», յայտնեց երեսփոխանը: