Ադրբեջանական Սումգայիթ քաղաքում կոտորածների զոհերի հիշատակի մասին հաղորդագրություն է տարածել Հայաստանում ԱՄՆ դեսպանատունը։
«Այսօր մենք միանում ենք հայերին` սգալով և տուրք մատուցելով 1988թ․ Սումգայիթում զոհ գնացածների հիշատակին»,- նշված է գրառման մեջ։
Ադրբեջանի Սումգայիթ քաղաքում հայ խաղաղ բնակչության կոտորածներն սկսվել են 1988 թվականի փետրվարի 27-ին եւ տեւել երեք օր։
Խորհրդային զորքերը քաղաք են մտցվել միայն փետրվարի 29-ին։
Սպանդին զոհ դարձածների իրական թիվը հայտնի չէ։ Խորհրդային պաշտոնական տվյալները հայտնում են 32 սպանվածի մասին։
Ջարդարարներից միայն մեկի նկատմամբ է մահապատժի դատավճիռ կայացվել։