«Հրապարակ» թերթը գրում է․
«Անցած 5 տարիներին ՀՀ քաղաքացիների կյանքը տարատեսակ հարկեր-տուրքերով բարդացրած իշխանություններն ընտրություններից հաշված ամիսներ առաջ անցել են «հետողորմյայի ռեժիմի»։ Արդեն տեղեկություններ են շրջանառվում, որ շուտով գույքահարկի, աղբահանության, տրանսպորտի, կարմիր գծերի ու տեղական տուրքերի վճարների թանկացումների մասին որոշումները հնարավոր է չեղարկվեն, քաղաքացիների համար գործեն նախկին սակագները։ Երեկ էլ Փաշինյանն անձամբ «ավետեց», որ ապրիլի 1-ից կենսաթոշակների ու նպաստների բարձրացում է սպասվում։
Այն դեպքում, երբ ընդամենը մեկ ամիս առաջ հայտարարում էր․ «Եթե մենք, օրինակ, 10 հազար դրամով բարձրացնենք թոշակը, միեւնույն է, խնդիրները չեն լուծվելու»։ Փաշինյանը համոզում էր, որ թոշակը թեկուզ 10 հազար դրամով բարձրացնելը ոչ մի իմաստ ու նշանակություն չունի: Ասում էր` նախ, դա այն գումարը չէ, որ թոշակառուի կյանքում բան փոխի, բացի դրանից, ըստ Փաշինյանի՝ թոշակառուն չգիտի, թե ինչ անի այդ 10 հազարը, որտեղ ծախսի: Հիմա հայտարարում է թոշակների ու նպաստների բարձրացման մասին, ինչը նշանակում է, որ իշխանության տեղն այնքան նեղ է, որ ստիպված է պետական միջոցներից ոչ թե ինքն իրեն պարգեւավճար տալ, այլ, իրենց տրամաբանությամբ` «քամուն տալ», միայն թե գոհացնի թոշակառուներին եւ նրանց քվեն ստանա առաջիկա ընտրություններում: Պատահական չէ, որ թոշակի այս բարձրացումը նախատեսում են ապրիլի 1-ից անել, այսինքն, մայիսին՝ ընտրություններից ընդամենը մեկ ամիս առաջ, թոշակառուների կյանքը 10 հազար դրամով հեշտացնելով, թերեւս, հույս ունեն հունիսի 7-ին իրենց էլեկտորատը համալրել թոշակառուներով։ Սա ոչ այլ ինչ է, քան պետական միջոցներով ընտրակաշառք բաժանել: Մենք տեղեկացանք նաեւ, որ մարզպետներին է հրահանգված՝ մարզպետարաններին հատկացվելիք բյուջեի «սոցիալական աջակցության» գումարները չխնայել նախընտրական ամիսներին, Սյունիքի մարզպետ Ռոբերտ Ղուկասյանը, դիցուք, վերջերս 1 միլիոն դրամ է բաժանել մոտ 3 տասնյակ ընտանիքի։
Փաստորեն, Նիկոլ Փաշինյանն ու իր խմբակը, որ քննադատում են այլոց սեփական միջոցներով նախընտրական աջակցության դրսեւորումները, ծաղրում Ծառուկյանի «տուկի թել», Արթուր Բաղդասարյանի «մուրաբաներ» օպերացիաները կամ ՀՀԿ-ի 5-10 հազարական դրամով քվե առնելը, այսօր զբաղված են դասական ընտրակաշառքի գործով, մի տարբերությամբ` դա անում են ոչ թե իրենց գրպաններից, այլ մեր՝ բոլորիս հարկերից ձեւավորված պետական բյուջեից։
Առաջիկա ամիսներին, անկասկած, պետական բյուջեի հաշվին ընտրակաշառքի այլ դրսեւորումներ էլ կլինեն, իշխանության հետ կապվող հիմնադրամների միջոցով ակցիաներ կանեն, տարբեր սոցիալական ծրագրեր ու դրամաշնորհներ կբաշխեն: Փոխարենը իրավապահ մարմինները խոշորացույցի տակ են վերցրել ընդդիմադիրների գործունեությունը եւ հատկապես` բարեգործական հիմնադրամների, քանի որ Քրեական օրենսգրքում ծածուկ մի քանի հոդված են ներմուծել, որը հնարավորություն է տալիս ընտրություններին մասնակցող քաղաքական ուժերի հետ այս կամ այն կերպ առնչություն ունեցող բարեգործական հիմնադրամների գործողությունները նախընտրական փուլում վերագրել առաջադրվող ուժերին եւ քրեական վարույթներ հարուցել։
Ընտրական օրենսգրքով՝ հանրապետության նախագահի կողմից ընտրությունների նշանակման պահից սկսած, այն կազմակերպությունները, որոնց անվանումները կարող են ասոցացվել ընտրություններին մասնակցող կուսակցությունների անվանումների հետ, կամ որոնք ղեկավարվում են այդ կուսակցությունների կողմից, մինչեւ ընտրության արդյունքների ամփոփումը չեն կարող բարեգործություն անել: Այս արարքը ենթադրում է 3-6 տարի ազատազրկում: Օրենքի այս կետն իշխանությունները հատկապես որպես մահակ են գործածում Սամվել Կարապետյանի եւ Գագիկ Ծառուկյանի գլխին, որոնց անվան հետ կապվող բարեգործական հիմնադրամները տարիներ շարունակ աջակցություն են ցուցաբերել քաղաքացիներին, Սամվել Կարապետյանի դեպքում՝ որեւէ քաղաքական ակնկալիք չունենալով։
Մի քանի շաբաթ է՝ իշխանությունն ու ընդդիմությունը բարեգործության արգելքի խախտումների համար փոխադարձ մեղադրանքներ են հնչեցնում։ Իշխանականները պնդում են, որ բարեգործության արգելքը խախտել են գործարար Սամվել Կարապետյանի թիմից՝ մոտ 100 ուսանողի խոստանալով վճարել 1 տարվա ուսման վարձը: Փոխարենը՝ վարչապետի կին Աննա Հակոբյանի ղեկավարած «Իմ քայլը» հիմնադրամը գրասենյակներ է բացում հանրապետությունով մեկ, արտերկիր գործուղումներ է ուղարկում, օրերս էլ 30 հոգու անգլերենի դասընթացների է հրավիրել, բայց դա խախտում չեն համարում ո՛չ ՔՊ-ում, ո՛չ էլ իրավապահ մարմինները։ Առաջինի դեպքում ուսումնասիրություններ են սկսել, երկրորդի դեպքում, ինչպես Հակակոռուպցիոն կոմիտեի ղեկավար Արթուր Նահապետյանն է երեկ լրագրողներին ասել, հաղորդում չի ներկայացվել։
Ակնհայտ է, որ իրավապահներն առաջիկա ամիսներին դառնալու են Փաշինյանի ձեռքում գործիք՝ բացառապես ընդդիմության դեմ են աշխատելու եւ իշխանությունների ակնհայտ խախտումների վրա աչք են փակելու, իսկ ընդդիմադիրներին ճնշելու են ամենաաբսուրդ մեղադրանքներով։ Մանավանդ որ իշխանության ջրաղացին ակտիվ ջուր են լցնում քաղհասարակություն կոչվող հատվածի «անաչառ» էքսպերտները, որոնք վայրկենական հաղորդումներ են ներկայացնում իրավապահ մարմիններին` ընդդիմադիրների հետ կապված, իսկ իշխանության բացահայտ ապօրինությունների եւ հանցավոր գործողությունների վրա աչք են փակում։ Միայն մի օրինակ բերենք` «Հայրենիք» կուսակցության անդամ, գիտությունների դոկտոր Խաչիկ Գալստյանը շուրջ երկու ամիս է՝ կալանքի տակ է միայն այն պատճառով, որ Էջմիածնի ընտրությունների ժամանակ ընտրական շտաբի անդամին գումար է տվել, որ ուտելիք առնեն` ընդմիջում անեն» ։