Սպիտակ տան բանբեր Քարոլայն Լեւիթ յայտարարեց. «Իրանի վերաբերեալ Միացեալ Նահանգներու նախագահ Տանըլտ Թրամփի առաջին ընտրանքը միշտ դիւանագիտութիւնն է, սակայն պատրաստ է անհրաժեշտութեան պարագային մահաբեր ուժ օգտագործելու»:
«Թրամփ Իրանի հետ աշխատանքին մէջ դիւանագիտութիւնը կը նախընտրէ», ըսաւ ան` նշելով. «Ուաշինկթըն եւ Թեհրան վերջին բանակցութիւններուն որոշ յառաջընթաց արձանագրեցին»:
Նախքան այդ, Միացեալ Նահանգներու նախագահ Տանըլտ Թրամփ հերքեց «ապակողմնորոշող» տեղեկութիւնները, թէ ամերիկեան բանակի սպայակոյտի պետ զօր. Տանիել Քին դէմ արտայայտուած է Իրանի դէմ պատերազմին, եւ նշեց, թէ զօրավարը ուրիշներուն նման պատերազմը չ՛ուզեր, սակայն յաղթանակը դիւրին կը տեսնէ, «եթէ Իրանին զինուորական կերպով դէմ դնելու որոշում տամ»:
«Իրանի համար չափազանց վատ օր մը պիտի ըլլայ, եթէ համաձայնութեան չհասնինք, եւ այն ամէնը, որ Իրանի հետ հաւանական պատերազմի մասին հրապարակուեցաւ, սխալ գրուած է», նշեց Թրամփ:
«Որոշումը ես կու տամ, եւ համաձայնութեան հասնիլը աւելի լաւ է, սակայն եթէ չկարենանք ատիկա կատարել, ապա Իրանի համար չափազանց վատ օր մը պիտի ըլլայ», աւելցուց Սպիտակ տան ղեկավարը:
Յիշեցնենք, որ Իրանի եւ Միացեալ Նահանգներու միջեւ բանակցութիւններու նոր փուլը տեղի պիտի ունենայ հինգշաբթի, 26 փետրուարին, Ժընեւի մէջ: