Հայաստանում Իրանի դեսպանը չի բացառել հայ-իրանական ավելի լայնածավալ զորավարժությունների անցկացումը։
«Հաշվի առնելով այդ թվում պաշտպանական բնագավառում երկրների միջև առկա կապերը, նման միջոցառումներ կարող են տեղի ունենալ նաև ապագայում և լինել ավելի մասշտաբային»,- ասել է դեսպանը Խալիլ Շիրղոլամին։
Հիշեցնենք, որ նախորդ տարի գարնանը տեղի են ունեցել երկօրյա համատեղ զորավարժությունները, որոնց ծրագրում ընդգրկված էին թեթև և ծանր զինատեսակների կիրառումը, հատուկ նշանակության ջոկատների դիպուկահարների հմտությունների ցուցադրումը, պայթեցման գործողություններ, ինչպես նաև կրակային աջակցություն:
Դեսպանն այսօր նկատել է, որ Հայաստանի պաշտպանության նախարար Սուրեն Պապիկյանը ներկայումս պաշտոնական այցով գտնվում է Թեհրանում, ինչը նույնպես վկայում է երկու երկրների հարաբերությունների առաջընթացի մասին։
«Այս այցի շրջանակներում կողմերը կկարողանան կարծիքներ փոխանակել տարբեր թեմաների շուրջ և խորացնել համագործակցությունը», — ասել է դեսպանն՝ ընդգծելով, որ Հայաստանի և Իրանի սահմանը միշտ եղել է խաղաղության սահման, եւ ռազմական ոլորտում համագործակցությունը հիմնված է պատմական կապերի, սահմանների անձեռնմխելիության և երկու երկրների տարածքային ամբողջականության պահպանման վրա։