Եվրամիությունը խաթարում է Ուկրաինայի հակամարտության կարգավորման միջազգային ջանքերը՝ մատակարարելով նրան զենք և ֆինանսական աջակցություն։ Այս մասին հայտարարել է Հունգարիայի արտաքին գործերի նախարար Պետեր Սիյարտոն՝ Բուդապեշտում իր չինացի գործընկեր Վան Իի հետ բանակցություններից հետո լրագրողների հետ զրույցում։
«Ես նախարարին ասացի, որ, ցավոք, եվրոպացիները անընդհատ խաթարում են խաղաղության ջանքերը», – ասել է Սիյարտոն։ Որպես դրա ապացույց՝ նա նշել է Կիևի և Բրյուսելի միջև կոալիցիայի ստեղծումը, որի նպատակն է ԵՄ-ից Ուկրաինային զենք և գումար մատակարարելը և ԵՄ-ին նրա անդամակցությունը արագացնելը։
«Հունգարիայի ինքնիշխան կառավարությունը, որը կենտրոնացած է ազգային շահերի պաշտպանության վրա, դեմ է դրան։ Հունգարացիները պաշտպանում են խաղաղությունը։ Պատերազմի շարունակությունը և Ուկրաինայի անդամակցությունը ԵՄ-ին լիովին հակասում են մեր շահերին», – ընդգծել է արտաքին գործերի նախարարը։
Միևնույն ժամանակ, նա նշել է, որ Հունգարիան բարձր է գնահատում Չինաստանի խաղաղապահ ջանքերը՝ ուղղված ուկրաինական հակամարտության դադարեցմանը։ «Մենք շնորհակալ ենք Չինաստանի կառավարությանը Ուկրաինայում խաղաղության ապահովմանը ցուցաբերած աջակցության համար», – ասել է Սիյարտոն։
Նա նաև հաստատել է Հունգարիայի հետաքրքրությունը Չինաստանի հետ ռազմավարական գործընկերության զարգացման, այդ թվում՝ տնտեսական համագործակցության ընդլայնման հարցում։ Նախարարը պարզաբանել է, որ արդեն երրորդ տարին անընդմեջ Չինաստանը դարձել է Հունգարիայում օտարերկրյա ներդրումների հիմնական աղբյուրը, որը մնում է «չինական ընկերությունների համար առաջնահերթ ուղղություն»։
Հաստատելով սա՝ նա հայտարարել է, որ Բուդապեշտի և Բելգրադի միջև չինական մասնակցությամբ կառուցված նոր արագընթաց երկաթուղին շուտով կսկսի գործել։ Նրա խոսքով՝ բեռնափոխադրումները կսկսվեն փետրվարի 27-ին, իսկ ուղևորափոխադրումները՝ մարտի 14-ին։ Ավելին, կողմերը համաձայնության են եկել ավելացնել Բուդապեշտի և չինական քաղաքների միջև չվերթների քանակը։