Շառլ Ազնավուրն այս տարի կդառնար 102 տարեկան։ Այդ առթիվ և նրա հարուստ ստեղծագործական ժառանգությունը նշելու համար Երևանում կանցկացվի համերգների և երաժշտական երեկոների շարք՝ նվիրված լեգենդար երգչին։
Ծրագիրը կբացվի Կոմիտասի անվան կամերային երաժշտության տանը կայանալիք «Ազնավուր․ հավերժ մեղեդիներ» կամերային համերգով։ Փետրվարի 9-ին Հայաստանի պետական կամերային երգչախումբը և մենակատարները կներկայացնեն Ազնավուրի հանրաճանաչ ստեղծագործությունների բազմաձայն մշակումներ՝ համադրելով դասական և ժամանակակից մոտեցումները։
Հաջորդ միջոցառումը կլինի TITIANO | The voice of Aznavour համերգն Արամ Խաչատրյանի անվան համերգասրահում։ Ֆրանսիացի երգիչ Տիցիանոն, որին հաճախ համեմատում են Ազնավուրի հետ իր վոկալային տեմբրի համար, փետրվարի 13-ին կկատարի հայտնի սիրային երգեր՝ Հայաստանի ազգային ֆիլհարմոնիկ նվագախմբի նվագակցությամբ։
Ծրագրում առանձնահատուկ տեղ է զբաղեցնում «Շառլ Ազնավուր․ Տուլուզ-Լոտրեկ» մյուզիքլը՝ երկու գործողությամբ։ Ներկայացումը երաժշտության և դրամայի միջոցով բացահայտում է մեծ արվեստագետի ուղին, ճակատագիրը և ներաշխարհը։ Ներկայացումը կառուցված է որպես հանդիսատեսի հետ մտերիմ, հուզական և անձնական զրույց, որը լի է տարբեր սերունդների հետ կապ ունեցող պատկերներով: Մյուզիքլը տեղի կունենա փետրվարի 20-ին՝ ժամը 19:00-ին, Ա. Սպենդիարյանի անվան օպերայի և բալետի ազգային ակադեմիական թատրոնի բեմում:
Խոշոր իրադարձությունը կլինի նաև Ազնավուրի, Կոնստանտին Օրբելյանի և Առնո Բաբաջանյանի երաժշտությանը նվիրված «Եռալեգենդ» մեծամասշտաբ երեկոն: Հայտնի հայ կատարողները ելույթ կունենան էստրադային սիմֆոնիկ նվագախմբի, երգչախմբի և պարային ստուդիայի ընդլայնված կազմի հետ: Երեկոն տեղի կունենա մարտի 14-ին՝ ժամը 19:30-ին, Արամ Խաչատրյանի անվան համերգասրահում:
Գարնանային ծրագրի գագաթնակետը կլինի Aznavour Toujours («Հավերժական Ազնավուր») մեծ համերգն Ազգային ակադեմիական օպերայի և բալետի թատրոնում: Արտիստի ծննդյան օրը՝ մայիսի 22-ին, բեմ կբարձրանան Քրիստինա Ազնավուրը և այն երաժիշտները, որոնք երգչին ուղեկցել են խոշոր միջազգային հարթակներում՝ դաշնակահար Էրիկ Բերշոյի գլխավորությամբ: Համերգից ստացված ամբողջ հասույթը կփոխանցվի «Ազնավուր» հիմնադրամի բարեգործական ծրագրին:
Այս միջոցառումները ևս մեկ ապացույց կլինեն, որ Ազնավուրի երաժշտությունը շարունակում է արձագանք գտնել Երևանում և միավորել ունկնդիրների տարբեր սերունդներ։
