Հանրապետութեան նախագահ Ժոզեֆ Աուն «Լիբանանի համար գերիշխանական ճակատ»-ի պատուիրակը ընդունելով յայտնեց. «Օտար պետութիւններուն Լիբանանի նկատմամբ վստահութեան վերականգնումն ու անոր աջակցիլը բնական արդիւնք են Լիբանանի ներկայիս կատարածին` պետութեան հաստատ հիմերու վրայ վերակառուցման, մասնաւորաբար օրէնքի իշխանութեան տարածման եւ զէնքի մենաշնորհի գործադրման առումներով: Անոնք երկու հարցեր են, որոնցմէ ետդարձ չկայ, ինչ ալ ըլլան հանգամանքները, եւ աշխատանք կը տանինք զանոնք հաւասարապէս ողջախոհութեամբ, իրատեսութեամբ ու պատասխանատուութեան իրագործելու: Անկարելի է դադրեցնել կատարումը երդման ճառիս մէջ խոստացածիս, որ թէ՛ հայրենիքի մէջ, թէ՛ արտերկրի մէջ աջակցութիւն ստացաւ, եւ որ մեծ պատասխանատուութիւն կը դնէ իմ վրաս, որպէսզի հաւատարիմ մնամ անոր»:
Հանրապետութեան նախագահը վերահաստատեց, որ ինք, խորհրդարանի նախագահ Նեպիհ Պըրրին եւ կառավարութիւնը կը պնդեն երեսփոխանական ընտրութիւնները կատարելու իրենց ժամկէտին, որ ճշդուեցաւ 3 մայիսին:
«Մերթ ընդ մերթ զանոնք տարբեր պատճառներով որոշ ժամանակով յետաձգելու մասին արծարծուող գաղափարները զիս բացարձակապէս չեն հետաքրքրեր, որովհետեւ ատիկա լիազօրութեան մէջ է օրէնսդրական իշխանութեան, որ այդպիսի գաղափարները պէտք է քննարկէ», նշեց ան:
Հանրապետութեան նախագահը ընդգծեց, թէ բոլոր թեկնածուներէն նոյն հեռաւորութեան վրայ կը գտնուի, «մանաւանդ որ ընտրական դաշինքներու մէջ պիտի չմտնեմ, եւ պարտականութիւնս ընտրական հոլովոյթին պարկեշտութիւնը, անվտանգութիւնն ու ապահովութիւնը ապահովելն է»:
Նախագահ Աուն յայտնեց, որ աշխատած է եւ կը շարունակէ աշխատիլ բոլոր շահագրգիռ կողմերուն հետ` «երկիրը նոր պատերազմի մէջ չներքաշելու համար, որովհետեւ լիբանանցի ժողովուրդը այլեւս չի կրնար նոր պատերազմներուն դիմանալ, եւ որովհետեւ միջազգային հանգամանքները ստեղծած են տուեալներ, որոնց պէտք է վերաբերիլ իրատեսօրէն եւ տրամաբանօրէն` Լիբանանն ու անոր ժողովուրդը պաշտպանելու համար, քանի որ որեւէ անխուսափելի վտանգ պիտի չթիրախաւորէ լիբանանցիներուն մէկ խումբը, այլ բոլորը, եւ եթէ կառոյցը, Աստուած չընէ, փուլ գայ, անիկա բոլորին գլխուն փուլ պիտի գայ»:
«Յոյսով եմ, որ Լիբանանին որեւէ վտանգ խնայելու համար գործադրուող ջանքերը հասկացողութեան պիտի արժանանան եւ դրական յանձնառութիւն ստանան», եզրափակեց նախագահ Աուն: