Իրանի արտաքին գործոց նախարարութեան բանբեր Իսմայիլ Պաղային յայտնեց. «Շրջանի պետութիւնները ամբողջովին կը գիտակցին, թէ Իրանի որեւէ սպառնալիք կամ անվտանգութեան չգոյութիւն ծանր ազդեցութիւններ ու հետեւանքներ պիտի ունենայ»:
«Անցեալ շաբթուան ընթացքին դիւանագիտական կազմը լուրջ ու պատասխանատու աշխատանք տարաւ երաշխաւորելու համար իրանցի ժողովուրդի շահերը եւ պահպանելու համար շրջանային խաղաղութիւնն ու կայունութիւնը: Իրանի նախագահ Մասուտ Փեզեշքիանի հետ բարձր մակարդակի հաղորդակցութիւններ տեղի ունեցան, ինչպէս նաեւ արտաքին գործոց նախարարը շրջանին մէջ իր պաշտօնակիցներուն հետ հեռաձայնային հաղորդակցութիւններ ունեցաւ: Այդ բոլորը` ի շահ իրանեան ազգային շահերու պաշտպանութեան»:
«Անցեալ օրերուն ընթացքին զինադադարի հաստատումէն ի վեր ամէնէն ուժեղ խախտումներէն մէկը տեսանք, եւ որ 30 պաղեստինցի զոհեր պատճառեց: Լիբանանի մէջ կը շարունակուին ենթակառոյցներու եւ բնակուած տուներուն վրայ յարձակումները, որոնց հիմնական նպատակը բարգաւաճումն ու յառաջդիմութիւնը խոչընդոտելն է, եւ ատիկա զինադադարի երաշխաւորներու պատասխանատուութիւնը կրկնապատկող բան մըն է», նշեց Պաղայի:
Անդրադառնալով Եւրոպայի կողմէ Իրանի Յեղափոխական պահակագունդը ահաբեկչական կազմակերպութիւն որակելու քայլին` ան նշեց. «Վերջին օրերուն արտաքին գործոց նախարարութիւն կանչուեցան բոլոր եւրոպական պետութիւնները, որոնք Թեհրանի մէջ դեսպանատուներ ունին:
«Մենք կը սերտենք շարք մը հարցեր: Այդ հարցը որոշում տալու համար փոխանցուեցաւ առնչակից հաստատութիւններու: Այդ քայլը միայն իրանցի ժողովուրդին նկատմամբ անարգանք մը չէր, այլ նաեւ Եւրոպական Միութեան կողմէ գործուած ռազմավարական սխալ մը», ըսաւ ան:
«Եւրոպայի ուշադրութենէն վրիպեցաւ, թէ ահաբեկչութեան դէմ պայքարի մէջ յառաջատար դեր կատարածներուն ամբաստանութիւն կ՛ուղղէ: Եթէ Եւրոպան կը կարծէ, թէ այս քայլը ի շահ Միացեալ Նահանգներու եւ սիոնական գոյացութեան է, ապա ամբողջովին կը սխալի», յայտնեց Իրանի արտաքին գործոց նախարարութեան բանբերը:
Պատասխանելով Միացեալ Նահանգներու հետ բանակցութիւնները թակարդ մը չըլլալը երաշխաւորելու համար Իրանի ռազմավարութեան մասին հարցումի մը` Պաղայի ըսաւ. «Հաստատ, որ նախկին փորձառութիւնները նկատի կ՛առնենք: Անցնող տասը տարիներուն ընթացքին Ամերիկայի կողմէ իր խոստումներու դրժումը հակառակը կատարելը եւ մեզի խաբելը տեսանք: Այդ մէկը գագաթնակէտին հասաւ յունիսին: Այս փորձառութիւնները դիւրին չէին, եւ որեւէ որոշում տալու ընթացքին զանոնք նկատի պիտի ունենանք»:
«Ամերիկայի մեր շրջանին մէջ վարմունքը միջազգային օրէնքի շարունակուող խախտում մը կը նկատուի: Ինչպէս արտաքին գործոց նախարարը յայտնեց, Իրան փաստեց դիւանագիտական ուղիին կառչած մնալը եւ ազգային շահերու ամրապնդման ու շրջանին մէջ խաղաղութեան ու անվտանգութեան պահպանման համար դիւանագիտութիւնը օգտագործելը:
«Դիւանագիտութեան ոլորտին մէջ մեր լրջութիւնն ու բարի կամեցողութիւնը փաստելու կարիքը չունինք: Միւս կողմը շարք մը բացթողումներ ու սխալներ գործեց:
«Շրջանի պետութիւնները, որոնք ներկայ կացութեամբ մտահոգուած են, անկեղծօրէն կը ջանան դրական դերակատարութիւն ունենալ, ի տարբերութիւն եւրոպական պետութիւններուն, որոնք ամբողջովին կը գործեն լարուածութիւններու մագլցման ուղղութեամբ: Անոնք պատգամի միջնորդ են, եւ բազմաթիւ կէտերու փոխանակում տեղի ունեցաւ», յայտնեց Իրանի արտաքին գործոց նախարարութեան բանբերը:
Ինչ կը վերաբերի բանակցութիւններու ձեւաչափին, Պաղայի նշեց. «Մենք կը սերտենք դիւանագիտական իւրաքանչիւր գործողութեան մանրամասնութիւնները, անոնց վերաբերեալ որոշում կու տանք եւ կը յուսանք յառաջիկայ օրերուն արդիւնքի հասնիլ»: