Իտալիայի առաջնության 23-րդ տուրի շրջանակում կայացած «Կրեմոնեզե»-«Ինտեր» հանդիպմանը արտակարգ դեպք է տեղի ունեցել։ La Gazzetta dello Sport-ի հաղորդմամբ՝ տանտերերի դարպասապահ Էմիլ Աուդերոն տուժել է հյուրերի՝ «Ինտերի» երկրպագուների տրիբունայից նետված ճայթրուկի պայթյունից։ Դրա ձայնային ալիքից խլացած Աուդերոնը ընկել է խոտածածկին։ Բժշկական անձնակազմն անմիջապես օգնություն է ցուցաբերել ֆուտբոլիստին, ինչից հետո նա կարողացել է շարունակել խաղը։
Խուլիգանական արարքը ծանր հետևանքներ է ունեցել նաև ագրեսիվ երկրպագուի համար։ Նրա ձեռքում վաղաժամ պայթել է երկրորդ ճայթրուկը, որը նա պատրաստվում էր նետել։ Պայթյունի հետևանքով տղամարդը կորցրել է ձեռքի մատները։ Ըստ աղբյուրի՝ հիվանդանոցից դուրս գրվելուց հետո նրան սպառնում է ձերբակալություն։
«Ինտերի» խաղացողները կտրուկ են արձագանքել իրենց երկրպագուների պահվածքին։ Ի նշան բռնության դեմ բողոքի՝ ֆուտբոլիստները խաղի ավարտից հետո հրաժարվել են մոտենալ տրիբունային և ողջունել իրենց երկրպագուներին։