Իտալիոյ ախոյեանութեան` «Սերի Ա.»-ի 23-րդ հանգրուանի մրցումներուն, պարագլուխի դիրքը գրաւող Ինթեր Միլան 2-0 արդիւնքով պարտութեան մատնեց Քրեմոնեզէն, այս վերջինիս դաշտին վրայ:
Լաութարօ Մարթինես եւ Փիոթր Զելենսքի նշանակեցին Ինթերի կոլերը: 60-րդ վայրկեանին դաշտ ներկայացաւ Հայաստանի ազգային խումբի նախկին խմբապետ Հենրիխ Մխիթարեան, որ գեղեցիկ առիթ մը ստեղծեց Տիմարքոյի համար, որուն ռմբային հարուածը մեծ քառակուսիի սահմանէն յետսապահի մը դպնալով քոռնըր ուղղուեցաւ:
Անցեալ տարեշրջանի ախոյեան Նափոլի, որ 3 մրցումներէ ի վեր յաղթանակ չէր կրցած արձանագրել, 2-1 արդիւնքով բաւական դժուար յաղթանակ արձանագրեց 18-րդ դիրքը գրաւող Ֆիորենթինայի դէմ: Վերկարա եւ Կութիերես նշանակեցին Նափոլիի կոլերը, մինչ Մանոր Սոլոմոն նշանակեց Ֆիորենթինայի միակ կոլը:
Եուվենթուս 4-1 արդիւնքով ծանր պարտութեան մատնեց Փարման` այս վերջինիս «Էնիօ Թարտինի» դաշտին վրայ:
Պրազիլցի յետսապահ Պրեմեր (2), Մաքենի եւ Տէյվիտ նշանակեցին Եուվէի 4 կոլերը, մինչ Քամպիասօ (սխալմամբ իր բերդին մէջ) նշանակեց Փարմայի միակ կոլը: