Փոխադարձ սպառնալիքներից հետո Միացյալ Նահանգներն ու Իրանը խոսում են բանակցությունների հնարավորության մասին։ ԱՄՆ նախագահ Դոնալդ Թրամփը հայտարարել է, որ հույս ունի համաձայնության հասնելու Թեհրանի հետ։ Թրամփն այս մասին ասել է այն բանից հետո, երբ Իրանի գերագույն առաջնորդ Ալի Խամենեին հայտարարել է, որ ԱՄՆ-ի հնարավոր հարձակումն Իրանի վրա կարող է լայնամասշտաբ հակամարտության հանգեցնել, որի մեջ ներգրավված կլինի ողջ տարածաշրջանը։
Վերջին օրերի միջազգային լրահոսը ողողված է Իրանի ափերին ամերիկյան ռազմանավերի մոտենալու մասին լուրերով։ Ընդ որում՝ դրանք ուղեկցվում են փոխադարձ սպառնալիքների ու զգուշացումների հիշատակումներով։
Թեհրանը մի քանի օր առաջ տեղեկացրեց, որ փետրվարի 1-ից ռազմածովային ուժերի զորավարժություններ է ծրագրում Հորմուզի նեղուցում։ Ավելի վաղ լուրեր տարածվեցին, որ Հորմուզի նեղուցում և Օմանի ծոցում Իրան-Ռուսաստան-Չինաստան համատեղ զորավարժություններ են ծրագրվում։
Իրանի արտգործնախարարության խոսնակ Էսմայիլ Բաղային հայտարարել է, որ Իրանը կարևոր դեր ունի Պարսից ծոցի և Հորմուզի նեղուցի անվտանգության ու կայունության ապահովման գործում, և որ այդ զորավարժությունները պարբերական են և անցկացվում են ամեն տարի՝ ըստ հաստատված ժամանակացույցի։ Նա վստահեցրել է, որ վարժանքների հիմնական նպատակը երկրի պաշտպանական կարողությունների ամրապնդումն է և զինված ուժերի պատրաստվածության բարձրացումը։
Իրանի ԱԳՆ խոսնակը պարզաբանել է, որ զորավարժությունները ուղղված չեն որևէ երկրի դեմ և արվում են ազգային անվտանգության համար։
ԱՄՆ նախագահ Դոնալդ Թրամփի վերջին սպառնալիքներին ու զգուշացումներին ի պատասխան՝ Իրանի գերագույն առաջնորդ այաթոլլահ Ալի Խամենեին այսպիսի հայտարարություն էր արել․
«Այդ պարոնը շարունակում է պնդել, որ մենք ռազմանավեր ենք բերել տարածաշրջան և արել ենք այս կամ այն։ Կարծում եմ՝ նա չպետք է վախեցնի իրանական ազգին նման բաներով, քանի որ դրանք ազդեցություն չեն ունենա իրանցիների վրա։ Իրանցիները չեն վախենում արդարացի բախումից։ Մենք չենք հրահրողները և չենք ցանկանում հարձակվել որևէ երկրի վրա։ Բայց ունակ ենք ուժեղ հակահարված հասցնելու յուրաքանչյուրին, որ կհարձակվի իրանցիների վրա»։
Այս զգուշացմանը հետևեց Խամենեի մեկ այլ նկատառում ևս․
«Ամերիկացիները պետք է գիտակցեն, որ եթե այս անգամ պատերազմ սկսեն, դա կլինի տարածաշրջանային պատերազմ»։
Չուշացավ նաև Դոնալդ Թրամփի արձագանքը․
«Իսկ ինչո՞ւ նա չպետք է նման բան ասի: Իհարկե, նա դա կասի: Բայց մենք այնտեղ ունենք աշխարհի ամենամեծ և հզոր նավերը: Շատ մոտ են՝ մի քանի օրվա հեռավորության վրա: Հույս ունեմ, որ մենք գործարք կկնքենք: Եթե ոչ, այդ ժամանակ մենք կիմանանք՝ նա ճիշտ էր, թե ոչ»:
Այս հայտարարությունից մեկ օր առաջ Թրամփը լրագրողներին ասել էր, որ Իրանը լրջորեն բանակցում է Վաշինգտոնի հետ: Ավելի ուշ Իրանի արտաքին գործերի նախարար Աբաս Արաղչին վստահություն էր հայտնել, որ իրենք կկարողանան համաձայնության հասնել Վաշինգտոնի հետ Թեհրանի միջուկային ծրագրի շուրջ՝ ընդգծելով, սակայն, որ կորցրել են վստահությունը ԱՄՆ-ի՝ որպես բանակցային գործընկերոջ նկատմամբ։
Արաղչին հայտարարել էր նաև, որ կարևոր դասեր են քաղել և արժեքավոր փորձ ձեռք բերել 2025 թ․ 12-օրյա պատերազմից, և եթե հարձակում տեղի ունենա Իրանի վրա, ապա պատասխանը կլինի շատ կտրուկ ու հուժկու։
Նա չէր պատասխանել հարցին, թե արդյոք Իրանը ռազմական օգնություն ստացել է Ռուսաստանից և Չինաստանից։
Իրանցի գեներալ Ահմադ Վահիդին ամերիկյան հայտարարությունները համարել է անխուսափելի պատերազմի տպավորություն ստեղծելու հոգեբանական գործողության մի մաս, որը նպատակ ունի ազդելու հասարակական կարծիքի վրա։ Նա զգուշացնում է, որ Իրանը չպետք է ընկնի այդ քարոզչական ծուղակը։
Բացի այդ, ի պատասխան Իսլամական հեղափոխության պահապանների կորպուսը ահաբեկչական կազմակերպություն ճանաչելու ԵՄ որոշման, Իրանը ԵՄ երկրների բանակներն է ավելացրել ահաբեկչական խմբերի ցանկի մեջ, իսկ Իրանի խորհրդարանը կոչ է արել երկրից վտարելու եվրոպացի ռազմական կցորդներին:
Ամերիկյան The National Interest պարբերականը գրում է․ «Իրանը, ընդլայնելով մարտադաշտը և բարձրացնելով հնարավոր վնասների գինը, ունակ է քաղաքական ճնշում գործադրելու ԱՄՆ-ի վրա։ Իրանը տիրապետում է այնպիսի կարողությունների, ինչպիսիք են հրթիռները, անօդաչու սարքերը և տարածաշրջանային դաշնակից ուժերը»:
Փորձագետները կարծում են, որ Իրանի վրա ամերիկյան հարձակումը կարող է թուլացնել իրանական ընդդիմության դիրքերը, մինչդեռ չհարձակվելը կուժեղացնի Վաշինգտոնի հանդեպ անվստահության մասին թեզը: