Ուքրանիան եւ Ռուսիան անջատաբար Միացեալ Նահանգներու հետ պիտի ստորագրեն 20 կէտերէ բաղկարած խաղաղութեան ծրագիրը. Եւրոպական Միութեան երկիրները զայն պիտի չստորագրեն: Այս մասին «Եւրոպական փրաւտա»-ի հետ հարցազրոյցի ընթացքին ըսած է Ուքրանիոյ արտաքին գործոց նախարար Անտրէյ Սիպիկա:
Ան չէ բացառած, որ պայմանները կրնան փոխուիլ, սակայն այս պահուս կը քննարկուի ինքնին այս կառուցուածքը:
«Եթէ խօսքը բացառապէս այս 20 կէտնոց շրջանակի մասին է, ապա ատիկա ներկայիս երկկողմանի փաստաթուղթ է, որ Միացեալ Նահանգներն ու Ուքրանիան պիտի ստորագրեն: Եւ Միացեալ Նահանգները զայն պէտք է ստորագրեն Ռուսիոյ հետ: Ասիկա այն շրջանակն է, որ ներկայիս կը քննարկուի, սակայն բանակցութիւնները տակաւին կը շարունակուին, ատիկա հոլովոյթ է», ըսած է Սիպիկա:
Լրագրողները նշած են, որ խաղաղութեան ծրագիրի կէտերէն մէկը կը վերաբերի Ուքրանիոյ Եւրոպական Միութեան անդամակցութեան: Սպիկա պատասխանած է` նշելով, որ նոյնիսկ եթէ Եւրոպական Միութիւնը փաստաթուղթը չստորագրէ, անիկա չի կրնար պարունակել որեւէ կէտ, որուն շուրջ եւրոպացի դաշնակիցներու հետ համաձայնութիւն չէ գոյացած:
Մեկնաբանելով «խաղաղութեան փաստաթուղթեր»-ու հաստատման եւրոպացի ներկայացուցիչներու մասնակցութիւնը` նախարարը նշած է, որ Եւրոպան խաղաղութեան հոլովոյթին մէջ եւ անվտանգութեան երաշխիքներու վերաբերեալ համաձայնագիրներուն մէջ ներկայ է:
«Ի դէպ, կարեւոր է, որ առաջին անգամ կը խօսինք յատուկ «անվտանգութեան երաշխիքներ»-ու, եւ ոչ թէ` «երաշխիքներ»-ու կամ նմանատիպ բանի մասին», աւելցուցած է ան:
Արտաքին գործոց նախարարը շեշտած է, որ Ուքրանիոյ տրամադրուող անվտանգութեան երաշխիքները պէտք է ըլլան իրաւաբանօրէն պարտադիր: