«Բենֆիկայի» գլխավոր մարզիչ Ժոզե Մոուրինյուն ջերմ խոսքեր է ուղղել «Ռեալը» գլխավորող Ալվարո Արբելոայի հասցեին՝ նրան անվանելով իր ամենասիրելի սաներից մեկը։
Հիշեցնենք, որ ավելի վաղ «Ռեալի» նախկին մարզիչը զարմանք էր հայտնել, որ աշխարհի լավագույն ակումբները ղեկավարում են «առանց պատմության» մարզիչներ՝ որպես օրինակ բերելով Ալեգրիին («Միլան»), Գասպերինիին («Ռոմա») և Սպալետիին («Յուվենտուս»)։
Արբելոան զուսպ էր արձագանքել։
«Երբ խոսում է նման մարզիչը, ես լսում եմ և վերլուծում։ Բոլորդ գիտեք, թե Մոուրինյուն ինձ համար ինչ նշանակություն ունի»,-ասել էր Արբելոան։
Ավելի ուշ պորտուգալացի մասնագետը հստակեցրել է իր դիրքորոշումը՝ խոսելով իսպանացու մասին։
«Նրանք բոլորն իմ երեխաներն են՝ իմ նախկին խաղացողները։ Արբելոան իմ սիրելիներից է թե՛ մարդկային, թե՛ անձնական համակրանքի տեսանկյունից։ Ալվարոն «Ռեալում» երբևէ հանդես եկած լավագույն մարդկանցից է։ Նա վերջինն էր, ում վրա կարելի էր ճնշում գործադրել։
Ես հույս ունեմ, որ նրա մոտ ամեն ինչ կստացվի, և նա ֆանտաստիկ կարիերա կունենա։
Արբելոան կարող է մարզել աշխարհի ցանկացած թիմ, և ես նրան հաջողություն եմ մաղթում։
Մարզիչ լինելը շատ բարդ է, հիմնականում այն պատճառով, որ միշտ կգտնվի մեկը, ով կարծում է, թե քեզնից ավելին գիտի։ Ալվարոն, ով դեռ նոր է սկսում կարիերան, պետք է իսկապես սիրի այս աշխատանքը»,- պորտուգալացու խոսքերն է մեջբերել A Bola-ն։