Մեծ Բրիտանիայի կառավարությունը կաշխատի համաձայնեցնել Եվրամիության հետ անվտանգության և պաշտպանության հարցերը՝ հաշվի առնելով ԱՄՆ նախագահ Դոնալդ Թրամփի վարչակազմի անկանխատեսելի քաղաքականությունը: Այս մասին հայտարարել է վարչապետ Քիր Սթարմերը Channel 4-ին տված հարցազրույցում:
«Եվրոպան պետք է ավելին անի: Մենք պետք է ավելի ուժեղ դիրքորոշում ընդունենք անվտանգության հարցում: Եվ խոսքը միայն ռազմական կարողությունների և համակարգման մասին չէ: Խոսքը հարցերի ավելի լայն շրջանակի մասին է՝ կիբերանվտանգություն, առևտուր, էներգետիկա: Սա ընդգծում է իմ այն փաստարկը, որ Մեծ Բրիտանիան պետք է ավելի մոտ լինի Եվրոպային: Մենք շտապ բանակցություններ ենք վարում այն մասին, թե ինչպես ամրապնդել Մեծ Բրիտանիայի և ԵՄ-ի միջև պաշտպանության, անվտանգության և հետախուզության ոլորտում համագործակցությունը», – ասել է նա:
Բրեքզիթի հանրաքվեն տեղի է ունեցել 2016 թվականի հունիսի 23-ին: Բրիտանացիների 51.9%-ը քվեարկել է ԵՄ-ից դուրս գալու օգտին, մինչդեռ 48.1%-ը՝ դեմ: Մի քանի տարվա բանակցություններից հետո Մեծ Բրիտանիան դուրս եկավ միությունից 2020 թվականի փետրվարի 1-ի գիշերը: