Եվրոպան ոչ մի կերպ պատրաստ չէ ստեղծել իր սեփական պաշտպանական դաշինքը՝ ՆԱՏՕ-ն փոխարինելու համար։ Այս մասին հայտարարել է Լիտվայի նախագահ Գիտանաս Նաուսեդան 15min առցանց պորտալին տված հարցազրույցում։
«Ես չեմ կարծում, որ մենք ներկայումս պատրաստ ենք Հյուսիսատլանտյան դաշինքը փոխարինել Եվրոպական ՆԱՏՕ-ով։ Մենք դրան ոչ մի կերպ պատրաստ չենք՝ քաղաքականապես, տեխնիկապես և ռազմական առումով», – պնդել է նա։
Լիտվայի ղեկավարի խոսքով՝ նման մակարդակի հասնելը կպահանջի զգալի ջանքեր։ «Սա այնպիսի աշխատանք է, որը կպահանջի զգալի ժամանակ», – ասել է Նաուսեդան։ Նա նման ծրագրերին վերաբերվում է կասկածամտությամբ։ «Այս մասին խոսակցությունները ինձ համար անլուրջ են թվում», – ընդգծել է նախագահը։
ԱՄՆ նախագահ Դոնալդ Թրամփի Դավոսում ունեցած ելույթին ի պատասխան, որի վերաբերյալ 15min-ը խնդրել էր նրան մեկնաբանել, Նաուսեդան նշել է, որ «տրանսատլանտյան կապերը մնում են հիմնարար»։ Նա հավելել է, որ Վաշինգտոնի հետ դաշինքից հրաժարվելը «շտապ որոշում կլինի»։