Ամբողջովին յստակ է, որ Ազրպէյճանի նկատմամբ այս կողմնակալ դիրքորոշումը կը ստեղծուի յատուկ լոպիական խումբերու, յատուկ ուժերու կողմէ, որոնք չեն կրնար ընդունիլ Ազրպէյճանի անկախ քաղաքականութիւնը: Ահա թէ ինչու մենք տարիներ շարունակ չենք համագործակցիր Եւրոպական խորհրդարանին կամ Եւրոպական խորհուրդի Խորհրդարանական վեհաժողովին հետ: Այս մասին Տաւոսի մէջ յայտարարած է Ազրպէյճանի նախագահը:
«Մենք կը համագործակցինք Եւրոպական յանձնաժողովին հետ, եւ ատիկա մեզի համար բաւարար է: Սակայն ես կը կարծեմ, որ Եւրոպական խորհրդարանը ինքզինք անյարմար դրութեան մէջ կը դնէ` մեզ մեղադրելով այնպիսի բաներու մէջ, որոնք մենք երբեք չենք ըրած, ներառեալ Հայաստանի նկատմամբ յարձակողական դիրքորոշման մէջ, մինչդեռ Հայաստան ինք կը կարեւորէ Ազրպէյճանի հետ իր յարաբերութիւնները», նշած է Ալիեւ:
Ան յիշեցուցած է, որ անցեալ տարուան օգոստոսին Սպիտակ տան մէջ նախաստորագրուած է Հայաստանի եւ Ազրպէյճանի միջեւ խաղաղութեան համաձայնագիրը:
«Հետեւաբար, ես յոյս ունիմ, որ Եւրոպական խորհրդարանի անդամները պիտի գտնեն համարձակութիւն վերատեսութեան ենթարկելու Ազրպէյճանի նկատմամբ իրենց անարդար քաղաքականութիւնը», ըսած է Ալիեւ:
Ալիեւ նաեւ Տաւոսի մէջ «Եուրոնիուզ»-ի հետ հարցազրոյցի ընթացքին նշեց. «Ինծի համար մեծ պատիւ է ստանալ հեղինակաւոր «Զայետի մարդկային եղբայրութեան մրցանակ»-ը, յատկապէս, որ անիկա կը կրէ Արաբական Միացեալ Էմիրութիւններու հիմնադիր, հանգուցեալ շէյխ Զայետի անունը: Ես ատիկա կը նկատեմ Կովկասի մէջ խաղաղութիւն հաստատելու մեր ջանքերու ճանաչում` աւելի քան 30 տարի տեւած արիւնահեղութենէ, տագնապէ եւ պատերազմէ ետք»:
«Այսօր Հարաւային Կովկասը կը մտնէ զարգացման նոր փուլ: Մենք խաղաղութեան մէջ կ՛ապրինք ընդամէնը հինգ կամ վեց ամիսէ ի վեր.՛ մենք կը սորվինք: Մեր անկախ պատմութեան ընթացքին մենք երբեք խաղաղութեան մէջ չենք ապրած: Եւ ատիկա իւրայատուկ զգացողութիւն է: Եւ, ի հարկէ, ասիկա հրաշալի կարելիութիւն է», նշած է Ալիեւ:
Ան ըսած է, որ Հայաստանի եւ Ազրպէյճանի միջեւ յարաբերութիւնները արդէն կը վերածուին համագործակցութեան:
«Մենք վերացուցած ենք Հայաստանի բեռնափոխադրումներու բոլոր սահմանափակումները: Աւելի՛ն, մենք սկսած ենք Հայաստանին մատակարարել կարեւորագոյն ապրանքներ, հիմնականին մէջ` նաւթամթերք, որմէ երկիրը մեծապէս կախեալ է», նշած է Ալիեւ: