Գրենլանդիայում անցկացվող եվրոպական զորավարժություններին ֆրանսիական զինվորականների մասնակցությունը պայմանավորված է Ֆրանսիայի դաշնակից Դանիային աջակցելու ցանկությամբ։ Այս մասին հայտարարել է Ֆրանսիայի նախագահ Էմանուել Մակրոնը՝ Դավոսում կայացած Համաշխարհային տնտեսական ֆորումում ելույթ ունենալով։
«Ֆրանսիան և Եվրոպան հավատարիմ են ազգային ինքնիշխանությանը և անկախությանը, Միավորված Ազգերի Կազմակերպությանը և դրա Կանոնադրությանը։ Եվ հենց այս սկզբունքների հիման վրա մենք որոշեցինք մասնակցել Գրենլանդիայում անցկացվող համատեղ զորավարժություններին, ոչ թե որևէ մեկին սպառնալով, այլ պարզապես աջակցելով մեր եվրոպացի դաշնակցին՝ Դանիային», -ասել է նա։
ԱՄՆ նախագահ Դոնալդ Թրամփը բազմիցս հայտարարել է Գրենլանդիայի՝ Միացյալ Նահանգներին միանալու անհրաժեշտության մասին։ Նույնիսկ իր առաջին ժամկետի ընթացքում նա առաջարկել էր գնել կղզին, իսկ 2025 թվականի մարտին վստահություն էր հայտնել, որ այն կարող է բռնակցվել։