Իրանի իշխանությունները հայտարարել են, որ չունեն ցուցարարներին, այդ թվում՝ 26-ամյա Էրֆան Սոլթանիին մահապատժի ենթարկելու ծրագրեր։ ԱՄՆ նախագահ Դոնալդ Թրամփը սա անվանել է լավ լուր: AFP-ի փոխանցմամբ՝ Սաուդյան Արաբիան, Օմանը և Կատարը Թրամփին համոզել են Իրանի դեմ ռազմական գործողություններ չձեռնարկել։
«Սա լավ լուր է: Հուսով եմ՝ այն կշարունակվի»,- գրել է ԱՄՆ նախագահ Դոնալդ Թրամփը Truth Social սոցիալական ցանցում՝ մեկնաբանելով Fox News-ի լուրը, որ Իրանի իշխանությունները «Թրամփի նախազգուշացումներից հետո» չեն պատրաստվում մահապատժի ենթարկել ցուցարարներին:
Հինգշաբթի իրանական պետական լրատվամիջոցները հայտնել են, որ անցյալ շաբաթ բողոքի ակցիաների ժամանակ ձերբակալված 26-ամյա Էրֆան Սոլթանիին մահապատիժ չի սպառնում:
Դատական մարմինները Սոլթանիի մահապատժի մասին տեղեկատվությունը անվանել են «բացահայտ կեղծիք»։
Նորվեգիայում գործող քրդական իրավապաշտպան Hengaw կազմակերպությունն ավելի վաղ հայտնել էր, որ Սոլթանիին մահապատիժ է սպառնում։ Սոլթանիի ընտանիքը իրավապաշտպան խմբին հայտնել էր, որ մահապատիժը նախատեսված էր չորեքշաբթի՝ հունվարի 14-ին, սակայն հետաձգվել է։
Չորեքշաբթի նաև Իրանի արտաքին գործերի նախարար Աբբաս Արաղչին հայտարարել էր, որ երկրի իշխանությունները «չունեն որևէ ծրագիր» ցուցարարներին մահապատժի ենթարկելու համար։ Նույն օրը Դոնալդ Թրամփն ասել էր, որ իր վարչակազմի տվյալներով՝ «Իրանում սպանությունները դադարել են»։
Դոնալդ Թրամփն ավելի վաղ սպառնացել էր Իրանի դեմ «շատ կոշտ միջոցներ» ձեռնարկել, եթե ցուցարարները մահապատժի ենթարկվեն ։ Արաղչիի հայտարարությունից հետո Թրամփը ասել էր, որ Սպիտակ տունը կհետևի իրավիճակին։
AFP-ն, հղում անելով մի քանի աղբյուրների, հաղորդում է, որ Սաուդյան Արաբիայի, Կատարի և Օմանի ներկայացուցիչները համոզել են Թրամփին հրաժարվել Իրանի դեմ ռազմական գործողություններից։
Մերձավոր Արևելքի երեք երկրներ «ձեռնարկել են երկարատև դիվանագիտական ջանքեր՝ համոզելու համար Թրամփին», — գործակալությանը հայտնել է սաուդցի պաշտոնյան՝ անանուն մնալու պայմանով։
Նախագահ Մասուդ Փեզեշքիանը հինգշաբթի՝ հունվարի 15-ին, հայտարարել է, որ կառավարությունը փորձում է լուծումներ գտնել դեկտեմբերի վերջին բողոքի ցույցերի պատճառ դարձած տնտեսական խնդիրների համար։
Իրավապաշտպանների տվյալներով՝ Իրանում անկարգությունների սկսվելուց ի վեր սպանվել է ավելի քան 2400 ցուցարար, իսկ ձերբակալվել է ավելի քան 18000 մարդ։