«Թրամփի ուղի՝ հանուն միջազգային խաղաղության և բարգավաճման» (ԹՐԻՓՓ) ծրագրի համար Հայաստան-ԱՄՆ կենսագործման շրջանակի հրապարակման վերաբերյալ համատեղ հայտարարությունը» ծրագրի իրականացման համար վերջնական փաստաթուղթը չի լինելու, հայտարարել է ՀՀ ԱԳ նախարար Արարատ Միրզոյանը՝ ներկայացնելով Վաշինգտոնում անցկացված բանակցություններն ու ստորագրված այս փաստաթուղթը։
Նախարարն այս հայտարարություն ձեռքբերում է համարում Հայաստանի, Միացյալ Նահանգների և մեր հարևանների համար։ Այն, ըստ Արարատ Միրզոյանի, օգոստոսի 8- ի հռչակագրի և վերջնական պայմանագրերի եւ վերաբերելի իրավական փաստաթղթերի միջև գտնվող հայտարարություն է։
«Այն, ինչ հանձնված է թղթին և հրապարակվել է երևանյան ժամանակով գիշերը, ավելին համաձայնեցված չէ, չկա որևէ պայման, որը բարձրացվել է, բանակցվել է և ունի համաձայնեցում, բայց չենք հրապարակել ինչ֊-ինչ նկատառումներից ելնելով։ Ուրեմն միանգամից եմ ասում և միանշանակ որևէ այդպիսի դրույթ չկա։ Կա այն, ինչ որ կա այս փաստաթղթում և հրապարակված է»,- ասել է նա։
Արտգործնախարարը TRIPP ծրագրում երեք շերտ է առանձնացրել.
Առաջին շերտը երրորդ երկիր- երրորդ երկիր փոխկապակցվածությունը. պայմանական Կենտրոնական Ասիա, Եվրոպական Միություն,
երկրորդ շերտը. Նախիջևան և Ադրբեջան փոխկապակցվածություն,
երրորդ շերտը. Հայաստան և երրորդ երկրներ փոխկապակցվածություն՝ երկու ուղղություններով. Հայաստան- Կենտրոնական Ասիա և Հայաստան- Արևմուտք։
Օգուտը ո՞րն է
ԱԳ նախարարը նշել է, որ հայտարարության մեջ նշված է, թե ինչի են ձգտում և ինչ օգուտներ են ունենալու ԱՄՆ-ն եւ Հայաստանն այս ծրագրի իրականացումից։ «Հայաստանը սրանով ընդլայնելու է իր դերակատարությունը որպես տարածաշրջանային տարանցիկ և տնտեսական հանգույցի, մեծացնելու է իր հնարավորությունը օտարերկրյա ներդրումներ ներգրավելու և այլն և այլն, ընդհուպ մինչև զբաղվածություն, հնարավորություններ, համատեղ ձեռնարկների հնարավորություն»,- ասել է Արարատ Միրզոյանը։
Ինչի՞ց է կախված TRIPP-ի հաջողությունը
Արարատ Միրզոյանը նշել է այն նախադրյալները, որոնք անհրաժեշտ են ծրագրի իրականացումը հաջողելու համար։ Այստեղ նա մեջբերել է հայտարարության տեքստը.
«Հայաստանն ու ԱՄՆ-ն ընդունում են, որ ԹՐԻՓՓ-ի հաջողությունը կախված է.
- Հայաստանի և Ադրբեջանի միջև խաղաղության հետագա ինստիտուցիոնալիզացումից,
- Հայաստան-Թուրքիա ամբողջական կարգավորման առաջընթացից,
- ԱՄՆ կայուն ներգրավվածությունից,
- տարածաշրջանային համագործակցությունից և կայունությունից,
- Հայաստանի ինստիտուտների կարողությունների արդյունավետ զարգացումից»։