Միացեալ Նահանգներու նախագահ Տանըլտ Թրամփ յայտարարեց, որ Իրանի դէմ զինուորական քայլի դիմելու ընտրանքը կը սերտէ:
Նախագահական օդանաւին մէջ պատասխանելով լրագրողի մը հարցումին, թէ Իրան անցաւ իր նախապէս ճշդած` ցուցարարներ սպաննելու կարմիր գիծը, Թրամփ յայտնեց. «Կը թուի, թէ սկսան այդ մէկը կատարել»:
«Չափազանց լրջութեամբ հարցին կը հետեւինք, բանակը եւս կը հետեւի, եւ մենք կարգ մը շատ ուժեղ ընտրանքներ կը սերտենք: Որոշում մը պիտի տանք», աւելցուց Սպիտակ տան ղեկավարը:
Միացեալ Նահանգներու նախագահը նաեւ յայտնեց, որ իրանեան ղեկավարութիւնը իրեն հետ կապ հաստատած է` «բանակցելու» ձգտելով:
«Իրանի ղեկավարները երէկ հեռաձայնեցին», ըսաւ ան` աւելցնելով. «Ժողովի մը պատրաստութիւն կը կատարուի: Անոնք կ՛ուզեն բանակցիլ»:
«Ժողով գումարելէ առաջ կրնանք ստիպուիլ գործի լծուիլ», ընդգծեց Թրամփ:
Սպիտակ տան ղեկավարը նաեւ խոստացաւ բանակցիլ գործարար Իլոն Մասքի հետ` «Սթարլինք»-ի միջոցով Իրանի մէջ համացանցային կապի վերականգնման վերաբերեալ:
Չինաստանի արտաքին գործոց նախարարութեան բանբեր Մաու Նինկ, պատասխանելով Թրամփի յայտարարութիւններուն մասին հարցումի մը, նշեց. «Մենք միշտ դէմ ենք այլ պետութիւններու ներքին հարցերուն միջամտութեան»:
«Բոլոր կողմերուն կոչ կ՛ուղղենք` Միջին Արեւելքի մէջ խաղաղութեան եւ կայունութեան համար յաւելեալ ջանք թափելու», աւելցուց ան: