«Բարսելոնան» պաշտոնապես հայտարարեց Ժոաու Կանսելուի վերադարձի մասին։ Կատալոնական ակումբը և սաուդյան «Ալ-Հիլալը» համաձայնության են եկել պորտուգալացի պաշտպանի վարձակալության հարցում։ 31-ամյա ֆուտբոլիստը «կապտանռնագույնների» կազմում հանդես կգա մինչև ընթացիկ մրցաշրջանի ավարտը և կկրի 2 համարի մարզաշապիկը։
Պայմանագրի ստորագրման արարողությունը տեղի է ունեցել երեքշաբթի՝ ակումբի գրասենյակում։ Արարողությանը ներկա են եղել «Բարսելոնայի» նախագահ Ժոան Լապորտան, փոխնախագահ Ռաֆայել Յուստեն, տնօրենների խորհրդի անդամ Ժոան Սոլերը, սպորտային տնօրեն Դեկուն, ինչպես նաև ֆուտբոլիստի ընտանիքի անդամները։
Սա Կանսելուի երկրորդ ժամանումն է Կատալոնիա։ Նա արդեն հանդես է եկել թիմի կազմում 2023/24 մրցաշրջանում՝ վարձավճարով տեղափոխվելով «Մանչեսթեր Սիթիից»։ Այդ ընթացքում նա առանցքային դերակատարում է ունեցել՝ մասնակցելով 42 հանդիպման (32-ը՝ Լա Լիգայում, 10-ը՝ Չեմպիոնների լիգայում)։ Իր առաջին մրցաշրջանում նա դարձել է 4 գոլի (2-ական գոլ Լա Լիգայում և ՉԼ-ում) և 5 գոլային փոխանցման հեղինակ։
2024 թվականի հունիսի 30-ին վարձակալության ժամկետի ավարտից հետո նա տեղափոխվել էր «Ալ-Հիլալ», որի հետ գործող պայմանագիրը նախատեսված է մինչև 2027 թվականի հունիսը։ Սաուդյան ակումբում անցկացրած մեկուկես մրցաշրջանի ընթացքում պորտուգալացին մասնակցել է 45 հանդիպման։ Transfermarkt հեղինակավոր պորտալը նրա տրանսֆերային արժեքը գնահատում է 10 մլն եվրո։