Ֆրանսայի արտաքին գործոց նախարար Ժան Նոել Պարրօ նշեց. «Ֆրանսան կ՛ողջունէ լիբանանեան իշխանութիւններուն կողմէ զէնքը պետութեան մենաշնորհը դարձնելու ծրագիրի առաջին փուլի նպատակներու իրագործման յայտարարութիւնը: Այս յառաջընթացը կարեւոր քայլ է դէպի իր բոլոր հողերուն վրայ լիբանանեան պետութեան գերիշխանութեան վերականգնման ուղղութեամբ, ինչպէս նաեւ ցոյց կու տայ լիբանանեան իշխանութիւններուն` իրենց ստանձնած յանձնառութիւններուն յարգումը»:
Պարրօ նաեւ ընդգծեց զինադադարի հսկողութեան Մեքանիզմի յանձնախումբի առանցքային դերակատարութիւնը` համակարգումով ՖԻՆԻՒԼ-ին հետ, «որուն ներկայութիւնն ու գործունէութիւնը տակաւին անհրաժեշտ կը մնան հարաւային Լիբանանի կայունութեան եւ ՄԱԿ-ի Ապահովութեան խորհուրդի թիւ 1701 որոշումի գործադրութեան համար»:
«Ֆրանսա լիբանանեան իշխանութիւններուն կոչ կ՛ուղղէ` երկրորդ փուլի ձեռնարկման ճամբով վճռականօրէն շարունակելու այս հոլովոյթը` տեւական կերպով ամրապնդելու համար պետութեան իշխանութիւնն ու բնակչութեան անվտանգութիւնը: Ֆրանսա նաեւ Իսրայէլին կոչ կ՛ուղղէ ինքնազսպումի եւ ետ կանգնելու որեւէ արարքէ, որ կրնայ լարուածութեան մագլցումի յանգեցնել», շեշտեց ֆրանսական դիւանագիտութեան պետը:
Պարրօ վերահաստատեց Ֆրանսայի հաստատ աջակցութիւնը լիբանանեան զինեալ ուժերուն, «որոնք Լիբանանի գերիշխանութեան եւ կայունութեան հիմնաքարը կը նկատուին, եւ կ՛ընդգծէ իր ամբողջական յանձնառութիւնը լիբանանեան զինեալ ուժերու աջակցութեան միջազգային խորհրդաժողովի նկատմամբ»:
«Ֆրանսա պիտի շարունակէ իր գործընկերներուն կողքին իր ջանքերը` տեւական խաղաղութեան ճամբուն վրայ աջակցելու Լիբանանին եւ յարգելու անոր գերիշխանութիւնն ու հողերու անվտանգութիւնը», յայտնեց ֆրանսական դիւանագիտութեան պետը: