ԱՄՆ նախագահ Դոնալդ Թրամփը հայտարարել է, որ Վենեսուելայի ընդդիմության առաջնորդ և Նոբելյան խաղաղության մրցանակի դափնեկիր Մարիա Կորինա Մաչադոն հաջորդ շաբաթ կժամանի Միացյալ Նահանգներ, և ինքը նախատեսում է հանդիպել նրա հետ։ Այս մասին նա հայտնել է Fox News-ին տված հարցազրույցում։Այս մասին հայտնում է NBC news-ը:
Թրամփի և Մաչադոյի հնարավոր հանդիպումը տեղի կունենա ԱՄՆ-ի կողմից Վենեսուելայի նախկին նախագահ Նիկոլաս Մադուրոյի ձերբակալությունից և երկրից դուրս բերումից հետո։ Ներկայում Վենեսուելայի ժամանակավոր նախագահ է նշանակվել Դելսի Ռոդրիգեսը, իսկ Կոնգրեսի մի շարք հանրապետականներ հանդես են գալիս Մաչադոյին երկրի ղեկավար դարձնելու օգտին։
Միևնույն ժամանակ Թրամփը նշել է, որ Մաչադոյի համար կարող է դժվար լինել ստանձնել առաջնորդի դեր՝ երկրի ներսում բավարար աջակցության բացակայության պատճառով։ ԱՄՆ պետքարտուղար Մարկո Ռուբիոն Մաչադոյին բնութագրել է որպես «հիանալի», սակայն ընդգծել է, որ իրավիճակը պահանջում է արագ որոշումներ։
Fox News-ի եթերում հարցին, թե արդյոք ինքը կընդունի Մաչադոյի Նոբելյան մրցանակը, եթե նա այն փոխանցի իրեն, Թրամփը պատասխանել է. «Լսել եմ, որ նա ցանկանում է դա անել։ Դա մեծ պատիվ կլինի»։
Թրամփը երբեք չի թաքցրել Նոբելյան խաղաղության մրցանակ ստանալու իր հավակնությունները և ակտիվորեն քարոզել է այդ գաղափարը։ Վերջերս NBC News-ին տված հարցազրույցում նա հերքել է The Washington Post-ի հրապարակումը, ըստ որի՝ Մաչադոն չի նշանակվել Վենեսուելայի ղեկավար Մադուրոյի ձերբակալությունից հետո, քանի որ նա արդեն ստացել էր Նոբելյան մրցանակը։
«Նա չպետք է հաղթեր այդ մրցանակը»,- նախկինում ասել էր Թրամփը։ «Բայց ոչ, դա կապ չունի իմ որոշման հետ»։