Արտգործնախարար Ասաադ ալ-Շեյբանիի գլխավորած սիրիական պատվիրակությունը մասնակցում է ԱՄՆ-ի միջնորդությամբ Փարիզում մեկնարկած Իսրայելի հետ բանակցությունների վեցերորդ փուլին։ SANA լրատվական գործակալությանն այս մասին հայտնել է կառավարական աղբյուրը։
«Երկօրյա բանակցությունները կենտրոնացած են 1974 թվականին կնքված Գոլանի բարձունքներում Իսրայելի և Սիրիայի զինված ուժերի տարանջատման համաձայնագրի վերականգնման վրա։ Սիրիական կողմը պահանջում է իսրայելական զորքերի դուրսբերում 2024 թվականի դեկտեմբերին գրավված տարածքներից», — նշել է աղբյուրը՝ հավելելով, որ Դամասկոսը ձգտում է «անվտանգության հարցերի վերաբերյալ արդար համաձայնության, որը լիովին կապահովի Սիրիայի ինքնիշխանությունը և կկանխի նրա ներքին գործերին ցանկացած միջամտություն»։
Աղբյուրը պարզաբանել է, որ իսրայելական զորքերը պետք է նահանջեն մինչև 2024 թվականի դեկտեմբերի 8-ը գոյություն ունեցող դիրքերը, երբ սկսվեց նրանց ներխուժումը Սիրիայի հարավում գտնվող ապառազմականացված գոտի։
Գործակալության տվյալներով՝ Փարիզում բանակցային թիմի կազմում է Գլխավոր հետախուզության վարչության պետ Հուսեյն ալ-Սալամը։ Իսրայելական պատվիրակությունը գլխավորում է ԱՄՆ-ում Իսրայելի դեսպան Եչիել Լեյթերը, որը փոխարինել է նախկին ռազմավարական պլանավորման նախարար Ռոն Դերմերին։ Նա հրաժարական էր տվել անցյալ տարվա նոյեմբերի 11-ին՝ խորհրդակցությունների հինգ փուլն անցկացնելուց հետո։
Ավելի վաղ համաարաբական «Աշարք ալ-Աուսաթ» թերթը հայտնել էր, որ Թրամփի վարչակազմը ճնշում է գործադրում Իսրայելի և Սիրիայի վրա՝ չհարձակվելու մասին պայմանագիր կնքելու համար, որը կհարթի երկկողմ հարաբերությունների կարգավորման ճանապարհը երկարատև թշնամությունից հետո։ Վաշինգտոնը պնդում է, որ Արաբական Հանրապետությունը միանա Աբրահամի համաձայնագրերին, որոնք ԱՄՆ միջնորդությամբ կնքվել են 2020-2021 թվականներին՝ արաբական երկրների խմբի և Իսրայելի միջև։