Հասարակություն
02.01.2026 | 16:39
2024 թվականի տվյալներով Հայաստանում 1 մլն 94 հազար մարդ դուրս է աշխատուժից, այսինքն՝ նրանք չեն աշխատում և չեն փնտրում աշխատանք։ Տվյալներն ամփոփված են ՀՀ վիճակագրական կոմիտեի «Աշխատանքի շուկան Հայաստանում – 2025» հրապարակման մեջ։
Աշխատուժից դուրս բնակչության գերակշիռ մասը կանայք են՝ 725 հազար, մինչդեռ տղամարդկանց թիվը կազմում է 367 հազար։ Տարածքային կտրվածքով՝ աշխատուժից դուրս է գտնվում քաղաքային բնակչության 742 հազար, իսկ գյուղական բնակչության՝ 352 հազար ներկայացուցիչ։
Կրթական մակարդակով ամենամեծ խումբը միջնակարգ կրթություն ունեցողներն են․ շուրջ կես միլիոն մարդ միջնակարգ կրթությամբ դուրս է աշխատուժից։ Նրանց մեջ ևս գերակշռում են կանայք՝ շուրջ 337 հազար կին, 166 հազար տղամարդ։
Ամուսնական կարգավիճակի տեսանկյունից առավել բարձր է ամուսնացած քաղաքացիների աշխատուժից դուրս գտնվելու ցուցանիշը․ այս խմբում ընդգրկված է 581 հազար մարդ, որոնց մեծ մասը դարձյալ կանայք են։
Ինչ վերաբերում է աշխատաշուկային չմասնակցելու պատճառներին, ապա հարցվածների մեծամասնությունը պատասխանել է՝ «շատ երիտասարդ եմ / մեծ եմ աշխատանք գտնելու համար»։
Միևնույն ժամանակ, ըստ աշխատաշուկայում մասնակցության պատրաստակամության գնահատման՝ ավելի քան 124 հազար քաղաքացի համարվել է պոտենցիալ աշխատուժ։
Համաձայն հետազոտության մեթոդաբանության՝ աշխատուժից դուրս բնակչության մեջ ներառված են անձինք, ովքեր հետազոտվող ժամանակահատվածում չեն աշխատել և աշխատանք չեն փնտրել, չեն եղել զբաղված կամ գործազուրկ:
Սովորաբար աշխատուժից դուրս բնակչությանն են դասվում.
- առկա ուսուցմամբ սովորողները, ուսանողները.
- տնային տնտեսությամբ զբաղվածները.
- կենսաթոշակառուները և հաշմանդամություն ունեցող անձինք.
- երեխաներին, հիվանդ հարազատներին խնամողները.
- զանազան պատճառներով չաշխատող և աշխատանք չփնտրող այլ անձինք (սեփականության օգտագործումից եկամուտ ստացողներ, պարտադիր ժամկետային զինծառայողներ և այլք)։
Անի Թամրազյան