«Ազատություն». Երևանի ու Բաքվի միջև կան հարցեր, որոնց շուրջ կողմերը դեռ համաձայնության չեն հասել, երեկ Հանրայինի եթերում հայտարարել է արտգործնախարարը: Արարատ Միրզոյանը, սակայն չի հստակեցրել՝ որոնք են այդ հարցերը:
Օգոստոսին Վաշինգտոնում ձեռք բերված համաձայնություններից հետո հայկական կողմը պնդում է՝ խաղաղություն է հաստատված: Ադրբեջանից մինչդեռ հայ-ադրբեջանական խաղաղության համաձայնագրի ստորագրման համար պահանջում են փոխել Սահմանադրությունը: Արտգործնախարար Միրզոյանը չլուծված խնդիրներից խոսելիս կենտրոնացավ հենց այս հարցի վրա՝ պնդելով, թե այդ օրակարգի շուրջ Բաքվի հետ բանակցություններ չկան:
«Պետք է սա ավարտվի ստորագրմամբ և հետո վավերացմամբ: Իրենք ունեն իրենց պատկերացումը, մենք այդ պատկերացումը չենք կիսում», – ասաց նա:
Հարցին, թե խոսքը սահմանադրական բարեփոխումների մասին է, Միրզոյանն արձագանքեց. «Այո, մենք չունենք երկկողմ այդպիսի՝ երկու կողմից ընդունված և դրա վրա աշխատվող օրակարգ: Նկատի ունեմ Սահմանադրության հարցը իրենց կողմից բարձրացվող, իրենք ունեն իրենց պատկերացումը, մենք ունենք՝ մեր, և դեռևս այստեղ համաձայնություն չունենք: Ես ասացի, որ մենք բազմաթիվ հարցեր լուծել ենք, բազմաթիվ բաներ արվում են, և կան կարևոր հարցեր, որտեղ դեռ չունենք փոխըմբռնում և համաձայնություն, և պետք է շարունակենք աշխատել»:
Վարչապետն անցած շաբաթ, արտգործնախարար Միրզոյանն էլ երեկ նշել են՝ TRIPP-ի իրականացման աշխատանքները կսկսեն 2026-ի ամռանը, Բաքվից պնդում են՝ 2026-ի ավարտին իրենց կողմում շինարարությունը կավարտվի:
Մանրամասները` սկզբնաղբյուր կայքում:
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: