Միացեալ Նահանգներու նախագահ Տանըլտ Թրամփ «Նիւ Եորք Փոսթ» օրաթերթի հետ հարցազրոյցի ընթացքին պատասխանելով այն հարցումին, որ եթէ Իսրայէլի վարչապետ Պենիամին Նեթանիահուի տեղ ըլլար, պիտի ճանչնա՞ր Սոմալիլենտը, ըսաւ. «Ո՛չ: Արդեօ՞ք մէկը գիտէ՞, թէ Սոմալիլենտը ի՛նչ է»:
Անդրադառնալով այսօր Մայամիի մէջ Նեթանիահուի հետ իր հանդիպումին` ան նշեց. «Կը նախատեսեմ, որ Նեթանիահուի հետ բանակցութիւնները կեդրոնանան Կազայի վրայ»:
«Ռուսիոյ եւ Ուքրանիոյ պատերազմի հարցով խաղաղութեան համաձայնութեան հասնելու նկատմամբ լաւատես եմ», ըսաւ Սպիտակ տան ղեկավարը:
«Ռուսիան կ՛ուզէ խաղաղութեան համաձայնութեան հասնիլ, եւ կը կարծեմ, որ ատիկա իրագործելու լաւ առիթ ունինք», յայտնեց Թրամփ:
«Ամէն անգամ, որ ռուսական կամ ուքրանական կողմերէն մէկը խաղաղութեան համաձայնութիւն կ՛ուզէ, միւս կողմը զայն կը մերժէ», նշեց Միացեալ Նահանգներու նախագահը:
Իսրայէլեան պետական ձայնասփիւռի կայանը երէկ հաղորդեց. «Իսրայէլի վարչապետ Պենիամին Նեթանիահու այսօր առաւօտեան պիտի ուղղուի Միացեալ Նահանգներ, այսօր` երկուշաբթի Միացեալ Նահանգներու նախագահ Տանըլտ Թրամփի հետ հանդիպելու համար»:
«Նեթանիահու Թրամփէն «կանաչ լոյս» պիտի խնդրէ ապագային Իրանը հարուածելու համար, եւ անոր պիտի փոխանցէ Համաս շարժումի զինաթափումէն առաջ Կազայի համաձայնութեան երկրորդ փուլ անցնելու Իսրայէլի մերժումը», նշեց ձայնասփիւռի կայանը: