Ես իմ քահանա եղբայրների ու հավատավոր ժողովրդի հետ պաշտպանում էի Մայր Աթոռի մուտքը: Ոմանցից ալկոհոլի հոտ էր գալիս, ոմանք էլ հայհոյախառն բառերով ծեծում էին դուռը՝ փորձում էին մտնել ներս ու խաթարել ներսում տեղի ունեցող աղոթական կարգը: Այս մասին Մայր Աթոռի բակում լրագրողների հետ զրույցի ժամանակ ասել է Հովhաննավանքի հոգևոր հովիվ Տեր Սարգիս քահանա Սարգսյանը:
Անդրադառնալով 10 եպիսկոպոսների արած հայտարարությանը Վեհափառի հրաժարականի պահանջով քարտուղարությանը նամակ ուղարկելու մասին՝ նշեց, որ տեղյակ չէ, թե սրբազան հայրերը ինչ հայտարարություններ են արել, քանի-որ ժողովրդի վանկարկումների մեջ ոչինչ չի լսվել:
«Մենք այստեղ ենք եղել, փորձում էինք հսկել, խաղաղեցնել, պահել մեր Տաճարի մուտքը»,- նշել է նա:
Հարցին, թե արդյո՞ք այսքան ժամանակ եկեղեցում եղել է վախի մթնոլորտ, ու արդյո՞ք եպիսկոպոսները ունեցել են խնդիրներ, որոնք վախեցել են բարձրաձայնել, պատասխանեց, որ Քրիստոսի եկեղեցին վախով չի առաջնորդվում՝ այնտեղ վախը տեղ չունի:
«Թող որևէ մեկս չմեծամտանանք ու դատավորներ չդառնանք, մենք Աստծո քահանաներ ենք: Աստված մեզ կարգել է ժողովրդին աղոթք անել սովորեցնել: Թող ոչ ոք իր աստիճանից բարձր չխոսի»,- եզրափակել է նա: